विनोदबाबु रिजाल
चितवन– रुस्लान थ्री स्टार क्लब १३ औं टुबोर्ग विकास रनिङ शिल्डको फाइनलमा पुगेको छ । सडन डेथमा घरेलु फुटबलको अर्को चर्चित क्लब लक्ष्मी हुन्डाई मनाङ मस्र्याङ्दी क्लबलाई बिहीबार हराउँदै थ्री स्टार उपाधि नजिक पुगेको हो । थ्री स्टारले शनिबार हुने फाइनलमा नेपाल एपिएफ क्लबको सामना गर्नेछ । फ्रेण्ड्स क्लबलाई बुधबार ३–१ ले हराउँदै फाइनल एपिएफ पुगेको थियो ।
नारायणगढको क्याम्पाचौरमा निर्धारित समयमा १–१ गोल भएपछि गरिएको टाइब्रेकरमा दुवै टिमबाट ३–३ गोल भयो । त्यसपछि सडन डेथमा थ्रीस्टार विजयी भयो । ८–८ जनाले प्रहार गरेको पेनाल्टी सुटआउटमा थ्रीस्टारका गोलकिपर एलेन न्यौपानेले ३ प्रहार रोके । म्यान अफ दी म्याच बनेका उनले १० हजार रुपैयाँ नगद पुरस्कार पाए ।
टाइब्रेकरमा थ्रीस्टारका निरज बस्नेत, सुनिल बल र गोलरक्षक एलेनले गोल हाने । तर, कप्तान निराजन खड्काको बल क्रस बारभन्दा निकै माथिबाट बाहिरियो भने स्ट्राइकर बुद्ध चेम्जोङको कडा प्रहार क्रसबारमा ठोकियो । मनाङका तर्फबाट अनिल गुरुङ, हेमन गुरुङ र विमल बस्नेतको प्रहार गोलमा परिणत हुँदा सुजल श्रेष्ठको बल पोष्ट बाहिर गयो भने विमल रानाको बल थ्रीस्टारका गोलरक्षक न्यौपानेले बचाए ।
टाइब्रेकरको ५–५ प्रहारमा ३–३ गोल भएपछि सडन डेथमा थ्रीस्टारका पिटर सेगुन र अजयी मार्टिनको बल मनाङका गोलरक्षक विशाल श्रेष्ठले रोके पनि विष्णु सुनुवारले गोल गरे । तर, मनाङका गौरव बुढाथोकी र विराज महर्जनको बल गोलरक्षक एलेनले रोक्दा विशाल राईको प्रहार पनि क्रस बारमा ठोकियो ।
निर्धारित समयमा लिएको अग्रता जोगाउन नसक्दा मनाङ एक महिनाको फरकमा थ्री स्टारसँग पराजित भएको छ । छैटौं मिनेटमा सुजल श्रेष्ठको पेनाल्टी गोलबाट मनाङले अग्रता लिएको थियो । थ्री स्टारका खेलाडीले विदेशी खेलाडी काचीलाई फाउल हानेपछि मनाङले पेनाल्टी पाएको थियो ।
दोस्रो हाफको सुरुआतमै अजयी मार्टिन्सले बराबरी गोल फर्काउँदै थ्री स्टारलाई खेलमा फर्काएका थिए । सुनिल बलको क्रसमा मार्टिन्सले ४९ औं मिनेटमा गोल फर्काएका थिए । निर्धिारित ९० मिनेटमा १–१, टाइब्रेकरमा पनि बराबरीपछि सडन डेथमा सफलता प्राप्त गर्दै थ्री स्टार वर्षमा पाँचौं नकआउट प्रतियोगिताको फाइनल पुगेको छ ।
यसअघि मदन भण्डारी स्मृति इटहरी गोल्डकप र २० औं बुढासुब्बा रेडबुल गोल्डकपको उपाधि जितेको थ्री स्टारले १६ औं आहा रारा गोल्डकप र रुस्लान नवौं सिमरा गोल्डकपको फाइनल खेलेको थियो । मनाङ र थ्री स्टाररसँगै यो सिजन नेपाल पुलिस क्लबले समान २ उपाधि जित्दा त्रिभुवन आर्मी क्लबले भने ६ वटा नकआउट उपाधि जितिसकेको छ ।
मनाङले चितवनमै जेसिज कप र दुवही गोल्डकपको उपाधि जितेपछि तीन वटा फाइनल गुमाएको थियो । जसमा सताक्षी गोल्डकप, मेत्री नेत्रालय काकररभिट्टा गोल्डकप र इटहरी गोल्ड कप छन् । विकास रनिङ शिल्डको विजेताले ५ लाख र दोस्रो हुने टोलीले २ लाख रुपैयाँ प्राप्त गर्नेछ ।
