रियो डे जिनाइरो (एजेन्सी) – विश्व फुटबलका सुपरस्टार तथा ब्राजिलियन फरवार्ड नेयमारको खुट्टामा चोटको समाचार ब्राजिलियन समर्थक माझ ठूलो धक्काको रुपमा आएको छ किनभने नेयमार सोचेभन्दा लामो समयका लागि मैदानबाहिर रहने देखिएको छ ।

नेयमारको मार्से विरुद्धको खेलमा दाँया खुट्टामा भएको पाँचौं मेटाटार्सल चर्केको थियो । त्यो बेला शल्यक्रिया गर्दा दुई महिनासम्म बाहिर रहने जानकारी आए पनि अहिले उनलाई पूर्णत: फिट हुन तीन महिना लाग्ने बताइएको छ । अबको ठिक तीन महिनामा विश्वकप पनि सुरु हुँदै छ ।

पिएसजीले सार्वजनिक गरेको प्रेस रिलिजमा लेखिएको थियो, “ब्राजिल फुटबल र पिएसजीले संयुक्त रुपमा नेयमारको शल्यक्रिया ब्राजिलमा निर्णय गरेको छ । डाक्टर रोड्रिगो लासमार नेतृत्वमा शल्यक्रिया हुनेछ ।”

यसले गर्दा उनले मार्च ६ मा रियल म्याड्रिड विरुद्धको महत्त्वपूर्ण च्याम्पियन्स लिग खेल त गुमाउने नै छन्, उनी विश्वकपसम्म पूर्ण फिट नहुने खतरा पनि आएको छ ।

गत विश्वकपमा ब्राजिलले जर्मनी विरुद्ध ७-१ को लज्जास्पद हार बेहोर्दा पनि नेयमार चोटका कारण मैदान बाहिर थिए । ब्राजिलका प्रशिक्षक टिटेले विश्वकपमा आफूले खेलाउने सुरुवाती ११ पनि सार्वजनिक गरिसकेका छन् ।

त्यसमा उनले नेयमारसँगै फरवार्ड लाइनमा बार्सिलोनाका फिलिप कौटिन्हो र म्यानचेस्टर सिटीका ग्याब्रियल जेसस राखेका छन् । यसले गर्दा पनि नेयमार समयमै फिट नहुनु ब्राजिलको विश्वकप अभियानको लागि ठुलो धक्का हुने छ ।