नुवाकोट (हाम्रो खेलकुद)– विभागीय नेपाल पुलिस क्लब नुवाकोटमा जारी विशाल सिमेन्ट नुवाकोट गोल्डकप फुटबल प्रतियोगिताको सेमिफाइनलमा पुगेको छ । नुवाकोट बट्टारस्थित खेल मैदानमा मंगलबार भएको क्वार्टरफाइनलमा पुलिसले रुपन्देही–११ माथि ३–० को सहज जित निकाल्दै अन्तिम चारमा स्थान बनाउन सफल भएको हो ।
नेपाल पुलिस क्लबका खेलाडी । फाइल तस्बिर
पुलिसको जितमा सुमन लामाले २ तथा अभिषेक रिजालले १ गोल गरे । एक पक्षीय बनेको खेलमा पुलिसले खेलको ३० औं मिनेटमा अभिषेकको गोलबाट सुरुवाती अग्रता बनाएको थियो । पहिलो हाफसम्म १–० को अग्रता बनाएको पुलिसका लागि दोस्रो हाफमा सुमन नायक बने । दोस्रो हाफमा दुवै गोल सुमनको नाममा रह्यो ।
सुमनले ५५ औं मिनेटमा गोल गर्दा पुलिसको अग्रता दोब्बर भएको थियो । सुमनले खेल सकिन ४ मिनेट बाँकी रहँदा अर्काे गोल थपेपछि पुलिसले रुपन्देहीमाथि ३–० को सहज जित निकाल्न सफल भयो । पुलिसविरुद्ध रुपन्देहीले कुनै पनि समयमा राम्रो पोष्ट आक्रमण बुन्न नसक्दा पराजित हुन पुग्यो ।
२ गोल गरेका पुलिसका सुमन खेलको म्यान अफ दि म्याच भए । उनले १० हजार रुपैया पाए । पुलिसले अब सेमिफाइनलमा पोखरा–११ सँग बिहिबार प्रतिस्पर्धा गर्नेछ । पोखराले नेपाल एपीएफ क्लबलाई पराजित गर्दै सेमिफाइनलमा स्थान बनाएको थियो ।
रुस्लान थ्री स्टार क्लब र आयोजक नुवाकोट–११ बीच बुधबार पहिलो सेमिफाइनल खेल हुनेछ । थ्री स्टारले मदन भण्डारी स्पोर्टस् एकेडेमी र नुवाकोटले फ्रेन्ड्स क्लब कुपन्डोललाई पराजित गर्दै अघि बढेको थियो । नुवाकोट जिल्ला फुटबल संघ र नुवाकोट खेलकुद विकास समितिको आयोजनामा भैरहेको प्रतियोगिताको विजेताले ५ लाख र ३ लाख प्राप्त गर्नेछन् ।
