गुवाहटी, २४ माघ । नेपाली पुरुष फुटबल टिमले भुटानविरुद्ध खेल्दै नेपालले १२औं दक्षिण एसियाली खेलकुद सागको सुरुआत गर्दैछ ।
नेपाल र भुटानको खेल गुवाहाटीस्थित नेहरु रंगशालामा दिउसो सवा दुई बजेपछि हुनेछ ।

दुई साताअघि बंगलादेशमा बंगबन्धु गोल्ड कपको उपाधि जितेको नेपाली टोली फेरि अर्को उपाधि जित्ने लक्ष्यसहित मैदान उत्रने तयारीमा छ । नेपाली टोलीमा अधिकांश यु–१९ का खेलाडीरुको बाहुल्यता छ । यसका साथै बंगबन्धु गोल्डकपका सर्वाेत्कृष्ट खेलाडी नवयुग श्रेष्ठको साथ पनि टोलीमा छ । यस्तै अनुभवी खेलाडी तथा कप्ता विराज महर्जन, विक्रम लामा र जगजित श्रेष्ठको साथ पनि टोलीलाई रहनेछ ।
नेपाली टोलीका मुख्य प्रशिक्षक राजुकाजी शाक्यले खेलाडीको मनोबल नै टोलीको जितको आधार भएको बताए । प्रशिक्षक शाक्यले समूह चरणको भुटानविरुद्धको खेल अर्काे चरण प्रवेशका लागि महत्वपूर्ण भएको बताए । उनले भुटानलाई पराजित गर्दै सेमिफाइनलमा प्रवेश गर्ने दाबी पनि गरे । भुटानलाई पराजित गर्न सके नेपाल समूह बीबाट सेमिफाइनलमा पुग्नेछ । नेपालले समूह चरणको दोस्रो तथा अन्तिम खेल ११ तारिखमा बंगलादेशसँग प्रतिस्पर्धा गर्नेछ ।