सेन्जेन (एजेन्सी) – ब्राजिली स्टार नेयमारले पुनरागमन गरेको खेलमा पेरिस सेन्ट जर्मेन (पिएसजी) ले फ्रेन्च सुपरकपको उपाधि जितेको छ । चीनको सेन्जेनस्थित युनिभर्सियाड स्पोर्टस् सेन्टरमा आज भएको फाइनलमा एएस मोनाकोलाई ४–० को फराकिलो अन्तरले पराजित गर्दै पिएसजीले फ्रेन्च सुपरकपको च्याम्पियन बनेको हो ।

पिएसजीको जितमा एन्जल डि मारियाले दुई तथा क्रिस्टोफोर कुन्कु र टिमोथी वेथले गोल गरे । ३२ औं मिनेटमा डि मारियाको गोलबाट पिएसजीले अग्रता बनाएको थियो । ३९ औं मिनेटमा क्रिस्टोफोरले गोल गरेपछि पिएसजीले पहिलो हाफमा २–० को अग्रता बनाएको थियो । दोस्रो हाफमा पनि पिएसजीले थप दुई गर्न सफल भयो ।

यसपटक युवा खेलाडी टिमोथी वेथ र डि मारियाले गोल गरे । टिमोथीले ६७ औं मिनेटमा गोल गर्दा डि मारियाले इन्जुरी समयमा टिमका लागि चौथो तथा व्यक्तिगत दोस्रो गोल गर्दै टिमलाई ४–० को जित दिलाउदै च्याम्पियन बनाए । यो खेलमा नेयमारले पिएसजीका लागि फ्रेब्रुवरीपछि पुनरागमन गरेको छ ।

नेयमार ७६ औं मिनेटमा मार्काे भेराट्टीको स्थानमा मैदान प्रवेश गरेका थिए । उनी विश्वकपपछि पहिलोपटक मैदान उत्रिएका हुन् । यस्तै नवनियुक्त प्रशिक्षक थोमस टचेलले सिजनको पहिलो उपाधि जित्न सफल भएको छ ।