गुहावटी, फागुन ३
नेपालले साग फुटबलतर्फ सोमबार उपाधिको लागि आयोजक तथा घरेलु टोली भारतको सामना गर्दैछ ।
गुहावटी र सिलोङमा जारी १२औं दक्षिण एसियाली खेलकुद साग अन्र्तगत सोमबार नेपालले फुटबलतर्फ (महिला÷पुरुष) दुवैले उपाधिको लागि खेल्दैछ ।

पुरुष तर्फको खेल नेपाली समयअनुसार साँझ ७ः१५ बजेपछि इन्दिरा गान्धी एथलेटिक्स् स्टेडियमा हुनेछ । भने महिलातर्फको खेल दिउसो चार बजेपछि सुरु हुदैछ ।
१७ वर्षपछि फाइनलमा प्रवेश गरेको नेपालले घरेलु भुमिमा भारतलाई हराउदै इतिहास बनाउने अवसर छ । सेमिफाइनलमा माल्दिभ्सविरुद्व नाटकीय जित निकालेको नेपालले सोमबार पनि फाइनलमा त्यस्तै प्रदर्शन गर्न जरुरी छ । निकै नै उत्कृष्ट लयमा देखिएका तथा एकै महिनामा तीन ह्याट्रिक पुरा गरेका नवयुग श्रेष्ठले त्यही लयलाई निरन्तरता दिन सके नेपाल उपाधि दिलाउन सक्नेछ । यस्तै विमल घर्तीमगर, अन्जन विष्ट र गोलरक्षक विकेश कुथुको उत्कृष्ट प्रदर्शन पनि नेपालको जितको लागि आधार बन्नेछ ।
सन् १९९३ मा भारतलाई पराजित गर्दै नेपालले उपाधि जितेको थियो । सन् १९९९ मा फाइनलमा चुकेको थियो ।
दक्षिण एसियाली फुटबलमा भारतको दबदबा रहेको बताउदै प्रशिक्षक शाक्यले यसपटक भारतलाई घरेलु भुमिमै पराजित गर्दै उपाधि रक्षा गर्ने बताएका छन् । ‘हाम्रा खेलाडीहरुले पछिल्ला केही महिनायता उत्कृष्ट प्रदर्शन गरिरहेका छन् । सेमिफाइनलमा शनिबार माल्दिभ्सविरुद्वको खेलमा पनि नेपालको प्रदर्शन उत्कृष्ट रह्यो ।’ प्रशिक्षक शाक्यले भने, ‘टिमवर्क र खेलाडीहरुको कडा मिहेनतले नै यो सम्भव भएको हो । फाइनलमा पनि यस्तै प्रदर्शनको आवश्यकता छ । मैले भारतमा थुप्रै खेल खेले । अब प्रशिक्षकको रुपमा रहदा भारतलाई पराजित गर्दै अर्काे उपाधि लिने योजना छ ।’
कप्तान विराज महर्जनले भारतविरुद्वको खेल हाम्रो लागि विश्वकपको फाइनल खेल जस्तै रहेको बताए । ‘मलाई विश्वकपको फाइनलमा पुगेको जस्तै अनुभति भइरहेको छ । जुन हाम्रो लागि महत्वपुर्ण छ । जसरी हामीले माल्दिभ्सविरुद्वको खेलमा आक्रमक शैलीमा खेल्दै अन्तिम समयमा जित निकाल्यौ । त्यस्तै प्रदर्शनलाई भारतविरुद्व निरन्तरता दिनु आवश्यक छ । कप्तान महर्जनले भने, ‘भारतविरुद्व उत्कृष्ट प्रदर्शन गर्दै उपाधिका साथ खुशी लिएर फर्कने छौ ।’

यस्तै सोमबारै सिलोङम हुने खेलमा नेपाली महिला टिमले पनि उपाधिको लागि भारतकै सामना गर्दैछ । खेल नेपाली समय अनुसार दिउसो सवा ४ बजेपछि सुरु हुनेछ ।
नेपालले अहिलेसम्म भारतलाई पराजित गर्न सकेको छैन । तर, नेपाली टिमका प्रशिक्षक धु्रव केसीले डिफेन्डिङ च्याम्पियन तथा आयोजक राष्ट्र भारतविरुद्व उत्कृष्ट खेल पस्कदै उपाधि जित्ने बताएका छन् । ‘हामीले लिग चरणमै भारतसँग खेलिसकेका छौं । उनीहरुको कमजोरी नियालेका छौ ।’ प्रशिक्षक केसीले भने, ‘दक्षिण एसियाली स्तरको महिला फुटबलमा पनि भारतीय दबदवा रहेको छ । दुवै टिमको उपाधि सम्भावना बराबरी छ । हामी भारतविरुद्व आत्मविश्वासका साथ खेल्दै उपाधि हत्याउने छौ ।’
नेपालले समूह चरणमा १० अंक जोडेको थियो । पहिलो खेलमा माल्दिभ्सलाई ३–० ले पराजित गरेको नेपालले दोस्रो खेलमा बंगलादेशलाई २–० ले तथा श्रीलंकलाई ४–० ले पराजित गरेको थियो । भारतसँग गोलरहित बराबरी खेलेको थियो ।