साफ सुजुकी कप – खेलको पूर्वसन्ध्यामा नेपाली खेलाडी स्विमिङ पुल र जिममा

ढाका (हाम्रो खेलकुद)– साफ सुजुकी कप (साफ च्याम्पियनसिप) को दोस्रो खेलमा भुटानलाई हराएको नेपाली टोलीलाई शुक्रबार आराम दिइएको छ । यद्दपी टोलीका खेलाडीले स्विमिङ पुल र जिममा समय बिताएका छन् । शनिबार समूह चरणको अन्तिम खेलमा आयोजक बंगलादेशको सामना गर्नुपर्ने भएकाले पनि टोलीलाई आराम दिइएको छ ।

सुरुवाती दुई खेल जित्दै बंगलादेश सेमिफाइनल पुग्ने सबैभन्दा सहज अवस्थामा छ । यद्दपी टोलीको अन्तिम चारको यात्रा तय हुन भने बाँकी छ । २ खेलबाट नेपाल र पाकिस्तानको समान ३ अंक रहँदा भुटानले भने अंकको खाता खोल्न सकेको छैन । यद्दपी, अघिल्लो चरण पुग्ने सम्भावना चार टोलीकै लागि खुला छ । दुवै खेलको नतिजा पछि मात्रै शीर्ष २ टोलीको टुंगो लाग्ने छ ।

नेपालले बुधबार भुटानलाई ४–० ले हराउँदै अन्तिम चार पुग्ने सम्भावनालार्ई जीवित राखेको थियो । अर्को खेलमा बंगलादेशले पाकिस्तानलाई १–० ले हराएको थियो । नेपालले पाकिस्तानसँगको पहिलो खेल भने २–१ ले गुमाएको थियो । बंगलादेशले भने भुटानमाथि २–० को जित निकालेको थियो । शनिबार साँझ नेपाल र बंगालदेश खेल्नुअघि पाकिस्तान र भुटानबीचको प्रतिस्पर्धा हुनेछ ।