काठमाडौं (हाम्रो खेलकुद) – अखिल नेपाल फुटबल संघ (एन्फा) ले आइतबार पत्रकार सम्मेलन गर्दै असोज १३ बाट लिग सुरु गर्ने घोषणा गरेको छ । यस घोषणासँगै झन्डै ५ वर्ष रोकिएको लिग फुटबल फर्किएको छ । विगतमा ए डिभिजन लिगको पुरस्कार ७५ लाख रहेपनि यसपटक पुरस्कारमा समायोजन गरिएको छ ।

लिगको विजेताले ५० लाख रुपैयाँ पाउनेछन् भने उपविजेता टोलीले ३५ लाख हात पार्नेछन् । तेस्रो हुने टोलीले २५ लाख तथा चौथोले १५ लाख रुपैयाँ प्राप्त गर्नेछ । त्यस्तै एन्फाले पाँचौं हुनेलाई ७ लाख र छैटौं हुनेलाई ५ लाख रुपैयाँ पुरस्कार दिने भएको छ । यसबाहेक लिगको अनुशासित टोलीले १ लाख रुपैयाँ पाउनेछ ।

विधागत रुपमा उत्कृष्ट प्रशिक्षक तथा खेलाडी (गोलकिपर, डिफेन्स, मिडफिल्ड र फरवार्ड) ले मोटरसाइकल प्राप्त गर्नेछन् । १४ टोली सम्मिलित प्रतियोगितामा राउण्ड रोबिन लिग प्रणालीमा खेलाइनेछ । यसको मतलब लिगमा कुल ९१ खेल हुनेछन् । प्रत्यक खेलको म्यान अफ द म्याचले १० हजार रुपैयाँ प्राप्त गर्ने पनि एन्फाले जानकारी दिएको छ ।

एन्फाले यसपटक खेल मिलेमतोलाई निरुत्साहित गर्न प्रत्यक खेलको विजेता टोलीलाई पनि पुरस्कार राशीको व्यवस्था गरेको छ । एन्फाको नयाँ प्रावधान अनुसार प्रत्यक खेलको विजेता टोलीले ५० हजार रुपैयाँ पाउनेछन् । यदि खेल बराबरी भएको खण्डमा भने दुवै टोलीले १५-१५ हजार रुपैयाँ प्राप्त गर्नेछन् ।

यसबाहेक एन्फाले लिग तयारी खर्च स्वोरुप प्रत्यक क्लबलाई २० लाख रुपैयाँ दिने निर्णय पनि गरेको छ । यो रकम हालसम्म एन्फाले कुनैपनि प्रतियोगिता तयारीको लागि दिएको सर्वाधिक रकम हो । यस रकमले क्लबहरु रेलिगेसन बिनाको लिग फुटबलमा खुलेर लाग्ने वातावरण सिर्जना गर्न सघाउ पुग्ने एन्फा स्रोतले जानकारी दियो ।

कुल पुरस्कार राशी :

विजेता – ५० लाख रुपैयाँ

उपविजेता – ३५ लाख

तेस्रो – २५ लाख

चौथो –  १५ लाख

पाँचौं – ७ लाख

छैटौं – ५ लाख

अनुशासित टोली – १ लाख

उत्कृष्ट प्रशिक्षक तथा खेलाडी –  ५ मोटरसाइकल -अनुमानित १० लाख

खेल विजेता – ९१ X ५० हजार =४५ लाख ५० हजार

म्यान अफ द म्याच – १० हजार X ९१ खेल =९ लाख १० हजार

कुल रकम दुई करोडभन्दा बढी हुने ।