काठमाडौं (हाम्रो खेलकुद)– राष्ट्रिय फुटबल टोलीका पूर्व कप्तान अनिल गुरुङले लक्ष्मी हुन्डाई मनाङ मस्र्याङ्दीसँगको लामो यात्राको अन्त्य गरेका छन् । पटक पटक गरि एक दशक मनाङमा बिताएका अनिलले दस दिनपछि सुरु हुने ए डिभिजन लिगमा अर्को क्लबको जर्सी लगाउने निर्णय गरेका छन् ।

मनाङबाट रिलिज लेटर लिएकै दिन बुधबार अनिलले रुस्लान थ्री स्टार क्लबको प्रशिक्षणमा सामेल भएका छन् । यद्दपी थ्री स्टारसँग सम्झौता भइनसकेको अनिलले हाम्रो खेलकुदलाई जनाएका छन् । ‘कुरा अघि बढेको छ, निर्णय भइसकेको छैन,’ उनले भने, ‘केहि दिनमा टुंगिनेछ ।’

पछिल्लो पटक सन् २०१० मा मनाङमा आबद्ध भएका अनिलको नेतृत्वमा क्लबले ए डिभिजन लिगसहित घरेलु फुटबलका अधिकांश उपाधि जितेको थियो । अनिलले खेल जीवनको अन्त्य मनाङबाटै गर्ने बताएका थिए । तर, उनले सोचे जस्तो भएन ।

‘व्यवासयिक खेल जीवनमा उतार चढाव हुन्छ । म मनाङमा परिवार जसरी बसेको थिए,’ उनले भने, ‘अब अहिले यात्रा यहि टुंगाउने निर्णयमा पुगे ।’ गत वर्ष अन्तर्राष्ट्रिय फुटबलबाट सन्यासको घोषणा गरेका अनिलले पहिलो पटक २००६ मा मनाङको जर्सी लगाएका थिए । त्यति बेला दुई र पछिल्लो आठ वर्ष गरि १० वर्ष उनले मनाङमा बिताए ।

पहिलो पटक मनाङ जानुअघि उनीले थ्री स्टारबाट पनि खेलेका थिए । थ्री स्टार जानुअघि उनले ब्रिगेड ब्वाइजबाट खेलेका थिए । केहि समय एनआरटीबाट खेलेका अनिलसँग आइलिगको पनि अनुभव छ । उनले सिलोङ लोजोङबाट व्यावसायिक फुटबल खेलेका थिए । लाजोङबाट फर्केपछि २०१० मा उनी पुनः मनाङमा आबद्ध भएका थिए ।