एजेन्सी – फुटबल खेलाडीको करिअरमा अनुशासन निकै महत्त्वपूर्ण पाटो हो । फुटबल मैदान भित्र होस् या बाहिर, खेलाडीको अनुशासनले नै उसको परिचय दिन्छ । कहिलेकाहिँ खेलाडीको खराब व्यवहारले खेलकै अस्मितामा प्रश्नचिन्ह उठाउने ठाउँ खडा हुन्छ ।

खेलाडी अनुशासनबाट बाहिर जाँदा रेफ्रीले कहिले पहेंलो त कहिले रातो कार्ड दिंदै खेलाडीलाई कारवाही गर्छन । आधुनिक फुटबलमा लुइस सुआरेज, सर्जियो रामोस लगायतका खेलाडी मैदान भित्र केहि खराब व्यवहारका कारण चर्चामा आएका छन् । यसले उनीहरु मैदान भित्र प्रतिभाशाली खेलाडी भएपनि समर्थकमाझ भने आलोचनाका पात्र बन्दै आएका छन् । फुटबल खेलाडीको करिअरमा अनुशासनले पनि ठूलो भूमिका खेल्छ ।

केहि खेलाडी यस्ता पनि छन् जसले मैदानभित्र देखाएको व्यवहारले दर्शकसमक्ष छुट्टै परिचय बनाउन सफल भएका छन् । अनुशासनलाई खेलकै एक पाटो मानेर त्यसलाई अनुसरण गर्ने केहि खेलाडी छन् । वर्षौंदेखि फुटबल खेल्दै आएपनि रातो कार्ड नपाएका ४ खेलाडी यसप्रकार छन् :

४. जोआओ मोउटिन्हो

पोर्चुगललाई युरो २०१६ जिताउन महत्त्वपूर्ण भूमिका खेलेका मोउटिन्होले आफ्नो करिअरमा एक दशक भन्दा बढी युरोपको ठूला टोलीबाट खेलेका छन् । एएस मोनाको, सपोर्टिङ लगायत क्लबबाट उनले लिग उपाधि पनि जितेका छन् । हालसम्म मिडफिल्डरको भूमिका निर्वाह गर्दै आएका उनले ४७ पहेंलो कार्ड पाएका छन् ।

३. करीम बेन्जेमा

रियल म्याड्रिडको लागि मात्र ४ सय भन्दा बढी खेल खेलिर्सकेका बेन्जेमा मैदानभित्र विवादमा कमै आउने खेलाडी हुन् । हालसम्म रातो कार्ड नपाएका बेन्जेमाले जम्मा ८ पहेंलो कार्ड पाएका छन् । फ्रान्सेली फरवार्डलाई बेलाबेलामा मैदान बाहिरको समस्याल पिरोलेपनि मैदानभित्र भने उनले अनुशासन देखाएका छन् ।

२. राउल

स्पेनका सर्वकालीन महान खेलाडीको छवि बनाएका राउल एक सफल कप्तान पनि हुन् । उनले रियल म्याड्रिडमा लामो समय आफ्नो करिअर व्यतित गरे । १७ वर्षे करिअरमा उनले कुनै खेलमा पनि रातो कार्ड पाएनन् । उनको शालीन स्वभावले उनलाई पछिल्लो दशकको उत्कृष्ट खेलाडीमध्ये एकका रुपमा स्थापित गर्न पनि सहयोग पुर्यायो ।

१. आन्द्रेस इनिएस्टा

बार्सिलोनाबाट झन्डै दुई दशक फुटबल खेलेका इनिएस्टाले ४ च्याम्पियन्स लिगसहित झन्डै ३ दर्जन उपाधि जितेका छन् । उनले यस क्रममा झन्डै ७ सय ५० खेल पनि खेले । तर यस दौरान उनले कहिल्यै रातो कार्डको सामना गर्नु परेन । उनको खेल्ने शैली जस्तै व्यक्तित्व पनि उत्तिकै सरल रहेको छ ।