काठमाडौं (हाम्रो खेलकुद)– रुस्लान थ्री स्टार क्लबका कप्तान विक्रम लामा चोटका कारण लामो समय मैदानबाहिर रहेपछि सक्रिय खेल जीवनमा फर्कने प्रयासमा छन् । सम्भवतः अर्को साता सुरु हुने लिगमार्फत उनले घरेलु फुटबलमा पुनरागमन गर्नेछन् ।

गत फागुनमा बुढासुब्बा गोल्डकप खेल्दा खुट्टा भाचिएपछि उनी मैदान बाहिरि रहँदै आएका छन् । नेपाल पुलिससँगको फागुन २७ गते फाइनल खेल्दा विपक्षी खेलाडीसँग ठोक्किएर उनको दायाँ नली खुट्टा भाच्चिएको छ । पहिलो हाफमा पुलिसका तेज तामाङसँग ठोक्किएपछि विक्रम घाइते भएका थिए । घटना भएको दिननै मध्यरातमा उनको शल्यक्रिया सम्पन्न भएको थियो ।

शल्यक्रियापश्चात अहिले पनि उनको खुट्टामा स्टिल छ । चोट भने पूर्ण रुपमा निकै भइसकेको विक्रमले जनाए । चोट पूर्ण रुपमा ठिक भइसकेका पनि अब खेल्नका लागि उनी तयार छन् । उनीले अभ्यास पनि सुरु गरिसकेका छन् । तर, अब उनी प्रतिस्पर्धात्मक फुटबलका लागि तयार भए नभएको परिक्षणका लागि थाइल्यान्ड जाने तयारीमा छन् ।

क्लबका उपाध्यक्ष अतिशकृष्ण श्रेष्ठको पहलमा उनी बैंकक अस्पतालमा परिक्षणका लागि जाने तयारीमा छन् । उनले बैंककमा फिफाले प्रमाणित गरेको बैंकक एकेडेमी अफ स्पोर्ट्स एण्ड एक्सरसाइज मेडिसिनमा उपचार गराउने छन्  । यो अस्पताल फिफाले आसियान क्षेत्रमा प्रमाणित गरेको पहिलो अस्पताल पनि हो । यहाँ खेलकुद सम्बन्धि चोटको विशेष शल्यक्रियाका साथै रिह्याबको कार्यक्रम पनि संचालन हुने गरेको छ ।

‘मेरो चोट ठिक भैसकेको छ । मैले अभ्यास पनि सुरु गरिसकेको छु,’ उनले भने, ‘तर अब प्रतिस्पर्धात्मक खेलमा फर्कनुअघि एक पटक म खुट्टाको परिक्षणका लागि बैंकक जान लागेको हु ।’ उनले बैंकक पुगेर सुरुआती केहि दिन परिक्षण गर्ने र खुट्टाको स्थिति हेरेर एक देखि दुई हप्ता त्यहीं रहेर रिह्याब गर्ने बताए ।

उनले नेपालमा चर्चित र सम्भावना बोकेका खेलाडी चोटका कारण पछि पुनरागमन असफल भएको त्यसमा आफु पनि सचेत रहेको बताए । ‘चोटका कारण हामीले प्रदीप महर्जन, चेतन घिमिरे, निराजन मल्ल जस्ता खेलाडीलाई लामो समय मैदानमा देख्न सकेनौं,’ उनले भने, ‘मलाई चोट लागेपछि फेरि त्यस्तै हुने हो की भन्ने चिन्ता थियो । त्यसैले म कुनै रिस्क लिन चाहन्न । पूर्ण रुपमा ठिक भएपछि मात्र मैदान फर्कने मेरो योजना हो ।’

विक्रमले अर्को साताबाट सुरु हुने लिगमा थ्री स्टार क्लबबाट खेल्दै छन् । उनी क्लबका कप्तान समेत हुन् । उनकै कप्तानीमा क्लबले मोफसलका विभिन्न उपाधि जित्नुका साथै दुई वर्षअघि एएफसी कपको छनोट चरण पनि पार गरेको थियो । तर एन्फाको लापरवाहीका कारण क्लबले दोस्रो चरण भने खेल्न पाएको थिएन । विक्रमले एसियन कप छनोटदौरान राम्रो प्रदर्शन गरेका थिए  । सन् २०१३ र २०१५ को साफ च्याम्पियनसिप खेलेका विक्रमले यस पटक बंगलादेशमा भएको प्रतियोगिता भने गुमाए ।