मड्रिड (एजेन्सी) – यूईएफए च्याम्पियन्स लिगमा रियललाई लगातार तेस्रोपटक उपाधि दिलाएपछि प्रशिक्षक जिनेदिन जिदानले प्रशिक्षक पद छाडे । जिदानले क्लब छाडेसँगै स्पेनिस महारथी रियल म्याड्रिड नयाँ प्रशिक्षकको खोजीमा थियो ।

विश्वकपको ठीक एक दिन अघि रियलले स्पेनका प्रशिक्षक जुलियन लोपेटेगुईलाई प्रशिक्षकको रुपमा नियुक्त गर्यो । रियलमा नियुक्त भएसँगै जुलियन स्पेनले राष्ट्रिय टोलीबाट बर्खास्तीमा परे । जुलियनको आगमनसँगै क्लबले आफ्नो उच्च प्रदर्शनलाई निरन्तरता दिने अपेक्षा थियो । तर, क्लबले लगातार खराब प्रदर्शन गर्यो । कमजोर प्रदर्शन गरेपछि बर्खास्त गर्न माहिर क्लबका अध्यक्ष फ्लोरेन्टिनो पेरेजको शिकार बने । स्पेनिस ला लिगा अन्तर्गत आइतबार राति भएको ‘एल क्लासिको’ मा बार्सिलोनासँग ५–१ ले पराजित भएपछि रियलले जुलियनलाई सोमबार राति मुख्य प्रशिक्षकबाट बर्खास्त गर्यो ।

जुलियनको प्रशिक्षणमा रियलले १४ खेल खेल्दा निकै कमजोर प्रदर्शन गरेको थियो । बार्सिलोनाको लज्जास्पद हारपछि रियल ला लिगामा नवौं स्थानमा छ । जुलियन मात्र हैन उनीभन्दा अघि रियलले कमजोर प्रदर्शन पछि प्रशिक्षकलाई बर्खास्त गरेको छ । यहाँ सन् २००० पछि रियलले बर्खास्त गरेको प्रशिक्षकको चर्चा गरिएको छ ।

कार्लाेस क्वेरेज (जुन २००३– मे २००४)

कार्लाेस क्वेरेजले इंग्लिस क्लब म्यानेचेस्टर युनाइटेडका मुख्य प्रशिक्षक सर एलेक्स फर्गुसनको सहायक प्रशिक्षकको रुपमा कार्य गरेका थिए । उनी निकै आशा लाग्दा प्रशिक्षकको रुपमा दरिएको थिए । यही सोचले रियलले भिसेन्ट डेल बस्कोको स्थानमा कार्लाेसलाई प्रशिक्षकको रुपमा नियुक्त गरेको थियो । तर, उनको प्रशिक्षणमा रियलले सोचेजस्तो प्रदर्शन गर्न सकेनन् । उनको प्रशिक्षणमा रियल ला लिगामा चौथो स्थानमा रहँदा च्याम्पियन्स लिगमा राम्रो प्रदर्शन गर्न नसकेपछि रियलले कार्लाेसलाई प्रशिक्षक पदबाट बर्खास्त गरेको थियो ।

जोसे एन्टोनियो कामाचो (मे २००४– सेप्टेम्वर २००४)

जोसे एन्टोनियो कामाचो रियलका स्थापित खेलाडी थिए । लेफ्ट ब्याक जोसेले रियलको सिनियर टिमबाट १९७४ बाट १९८९ सम्म खेलेका थिए । सफल खेलाडी जोसेलाई क्लबले १९९८ मा कोचिङ स्टाफको रुपमा नियुक्त गरेको थियो । कार्लाेस क्वेरेजलाई रियलले बर्खास्ती गरेपछि जोसेलाई प्रशिक्षकको रुपमा अनुबन्ध गरेको थियो । तर, उनको प्रशिक्षणमा राम्रो खेल्न सकेन । ६ खेलमध्ये २ खेलमा हार बेहोरेपछि रियलले उनलाई बर्खास्त गर्यो ।

राफयल बेनिटेज (जुन २०१५ –जनवरी २०१६)

रियल मड्रिड खेलाडीका लागि मात्रै नभई प्रशिक्षकको लागि निके गाह्रो हुने क्लब हो । राम्रो नतिजा निस्कन नसके क्लबलाई बर्खास्तको निणर्य गर्न ढिलाई नै गर्दैनन् । यसैको मारमा राफयल बेनिटेज परे । लिभरपुलका पूर्वप्रशिक्षक बेनिटेजको प्रशिक्षणमा एल क्लासिकोमा ४–० को हार बेहोरेपछि रियलले बेनिटेजलाई ७ महिना भित्रै बर्खास्ती गर्यो ।

जुलियन लोपेटेगुई (जुन २०१८ – अक्टोवर २०१८)

जुलियन खराब प्रशिक्षणपछि बर्खास्तीमा पर्ने रियलको पछिल्लो प्रशिक्षक बने । जिदानको बर्हिगमनपछि रियल सम्हाल्न आएका उनको प्रशिक्षणमा रियलले लगातार खराव प्रदर्शन दोहोर्यायो । रियल यूईएफए सुपर कपमा शहरी प्रतिद्वन्द्वी एट्लेटिको म्याड्रिडसँग ४–२ ले पराजित भयो । त्यसअघि रियल च्याम्पियन्स लिगमा सिएसकेए मस्कोसँग १–० ले स्तब्ध बन्यो । स्पेनिस ला लिगामा बार्सिलोनासँगै रियल लेभान्टे, अलाभेस र सेभिल्लासँग पराजित भएको थियो ।