एजेन्सी – क्याटलान क्लब बार्सिलोना हाल कप्तान लिओनेल मेसीबिना नै खेलिरहेको छ । पछिल्ला ५ खेलमा टोलीमा मेसीको उपस्थिति नभएपनि बार्सिलोनाले ४ जित र १ बराबरी गर्न सफल भएको छ ।

ला लिगामा सेभिल्लाविरुद्ध खेलमा चोट बोकेपछि मैदान छाडेका मेसी त्यसयता टोलीको खेल हेर्न मैदानको दर्शकदिर्घामा भने नियमित उपस्थिति जनाइरहेका छन् । मेसीको अनुपस्थितिमा बार्सिलोनाले रियल म्याड्रिडलाई ५-१ ले हराएको थियो । त्यसपछि इन्टर मिलानलाई च्याम्पियन्स लिगमा २-० ले पराजित गर्न सफल बार्सिलोनाको लागि मेसीको अनुपस्थिति घाटामात्र भएको छैन । मेसीको अनुपस्थितिमा बार्सिलोनाले पाएको ४ फाइदा :

सुआरेजले लय समात्ने मौका पाए

कप्तान मेसीको अनुपस्थितिमा सुआरेजले गोल गर्ने जिम्मेवारी सफलतापूर्वक निर्वाह गरे । सिजनको सुरुवातमा गोल गर्न नसकेका कारण आलोचनाको पात्र बन्दै आएका सुआरेजले आफ्नो स्तर प्रदर्शन गर्दै उत्कृष्ट खेल पस्किए । उनले विशेषत रियल म्याड्रिडविरुद्ध गरेको ह्याट्रिक र ला लिगामा रायो भालेकानोविरुद्ध गरेको दुई गोलले उनको हौसला अझै बढेको थियो ।

टोली एकतृत रुपमा अझै बलियो

रियल म्याड्रिडमा क्रिस्टियानो रोनाल्डो उपस्थित नहुँदा टोलीको प्रदर्शन र नतिजा खस्कियो । धेरैले मेसी नहुँदा बार्सिलोना पनि सोहि स्थितिमा पुग्ने आँकलन गरेका थिए । तर बार्सिलोनाले तिनलाई गलत तुल्याउँदै ५ खेलमा ४ जित दर्ता गर्यो । मेसीको अनुपस्थितिमा टोलीका अन्य खेलाडीले थप मिहिनेत गर्दै उनको कमी महसुस हुन दिएनन् । लुइस सुआरेजले अग्रपंक्ति सम्हाले, आर्थर मेलोले मध्यक्रममा लगातार डटिरहे, बुस्केट्सले मध्यक्रम सम्हाले, अन्य खेलाडीले पनि आफ्नो जिम्मेवारी राम्रोसँग पूरा गरे ।

बार्सिलोनाको असली परिचय

पछिल्लो एक दशक बार्सिलोनाको सफलतामा मेसीको ठूलो हात रहेको सर्वविदितै छ । मेसीले धेरैपटक बार्सिलोनाको उद्दार नै गरेका छन् । तर मेसीबिना पनि बार्सिलोनाले आफ्नो प्रभाव कायम राख्यो । स्पेनको सबैभन्दा महत्त्वपूर्ण खेल एल क्लासिकोमा रियल र बार्सिलोना विश्वका उत्कृष्ट दुई खेलाडी बिनै लामो समयपछि उत्रिएका थिए । बार्सिलोनाले घरेलु मैदानमा फराकिलो जित दर्ता गर्दै विश्व फुटबललाई नै आफ्नो परिचय सधैं उही रहने संदेश दियो ।

मेसीपछि बार्सिलोना कस्तो हुनेछ

पछिल्लो समय मेसी घाइते हुँदा बार्सिलोनाको नतिजामा पनि प्रत्यक्ष असर पर्ने गरेको थियो । एक समय बार्सिलोना रिभाल्दो, रोनाल्डिन्हो लगायत खेलाडीमा निर्भर थियो । अहिले मेसीमा छ । र जस्तो प्रदर्शन मेसीबिना बार्सिलोनाका खेलाडीले गरे, त्यसले पनि भविष्यमा बार्सिलोनाले आफ्नो स्तर कायम राख्ने देखिएको छ । युवा खेलाडीले मेसीको अनुपस्थितिमा गरेको प्रदर्शनले बार्सिलोनालाई केहि आशा गर्ने ठाउँ बनेको छ । फिलिपे कोउटिन्हो, ओस्मान डेम्बेले, सर्जी रोबर्टो, अर्थर मेलो, लगायत खेलाडीले बार्सिलोनाको भविष्य उज्ज्वल बनाउने छन् ।