एजेन्सी – जोसे मोउरिन्हो र पेप गुआर्डीओला आधुनिक फुटबलका उत्कृष्ट प्रशिक्षकमध्यमा पर्छन् । दुवै प्रशिक्षकले विभिन्न देशका क्लबहरुलाई सफलता दिलाएर आफूलाई प्रमाणित गरिसकेका छन् ।

दुवै प्रशिक्षकले क्याटलान क्लब बार्सिलोनामा सहायक प्रशिक्षकका रुपमा आफ्नो करिअरको सुरुवात गरेका थिए । यी दुई प्रशिक्षकसँग विश्वका ठूला क्लबको इच्छामा त पर्छन नै, खेलाडीहरु पनि यी प्रशिक्षकहरु सँग खेल्न रुचाउने गर्छन् । मोउरिन्हो र गुआर्डीओलाले पछिल्लो समय मेसी र रोनाल्डोजस्ता विश्वका उत्कृष्ट खेलाडीलाई पनि प्रशिक्षण दिए । तर कमै यस्ता खेलाडी छन् जसले यी दुवै प्रशिक्षकसँग खेल्ने मौका पाए ।

१. एलेक्सिस स्यान्चेज

हाल म्यानचेस्टर युनाइटेडमा मोउरिन्होको प्रशिक्षणमा खेलिरहेका स्यान्चेजले यसअघि बार्सिलोनाबाट खेलिसकेका छन् । सन् २०११ मा पेप गुआर्डीओलाले नै सिरी ए क्लब उडीनेजेबाट स्यान्चेजलाई बार्सिलोना भित्र्याएका थिए । त्यसपछि उनी आर्सनल हुँदै म्यानचेस्टर युनाइटेड आइपुगेका हुन् । सन् २०१२ मा गुआर्डीओलाले क्लब छाड्नुअघि एक सिजन सँगै खेल्दा स्यान्चेजले १२ गोल गरे । यद्यपी स्यान्चेजले हालसम्म युनाइटेडमा गुआर्डीओलासँग खेलेजस्तो प्रदर्शन गर्न सकेका छैनन् ।

२. सेस फाब्रीगास

बार्सिलोनाको एकेडेमी ला मासियाबाट उत्पादन भएका मिडफिल्डर फाब्रिगासले व्यवसायिक करिअरको सुरुवात आर्सनलबाट गरे । उनले ८ वर्ष त्यहाँ बिताए र सन् २०११ मा २९ मिलियन युरोमा गुआर्डीओला प्रशिक्षक छँदै बार्सिलोना आए । त्यसबेला जाभी, इनिएस्टा र बुस्केट्स उच्च फर्ममा रहँदा पनि फाब्रिगासले स्थान बनाउन सकेका थिए । सन् २०१४ मा जोसे मोउरिन्होले उनलाई चेल्सी ल्याए । लिगको पहिलो सिजन उपाधि जित्ने क्रममा उनले लिगको सर्वाधिक असिस्ट जोड्ने खेलाडी पनि बने ।

३. पेड्रो रोड्रीग्वेज

सन् २००९ मा बार्सिलोनाको दोस्रो टोलीबाट गुआर्डीओलाले नै पेड्रोलाई सिनियर टोलीमा ल्याएका थिए । त्यसपछि बार्सिलोनामा लगातार राम्रो प्रदर्शन गरेका उनले २००९-१० मा लिगको उदयीमान खेलाडीको उपाधि पनि जिते । सन् २०१५ मा उनलाई मोउरिन्होले चेल्सी ल्याए । त्यसपछि डेब्युमा गोल गरेका उनले लगातार राम्रो प्रदर्शन गरे । मोउरिन्हो र पेड्रो ६ महिना मात्र सँगै भएपनि उनले दुवै प्रशिक्षकको फरक भने पाए ।

४. केभीन डे ब्रुएन

दुवै प्रशिक्षकले खेलाएका उत्कृष्ट खेलाडीमा बेल्जियन मिडफिल्डर केभीन डे ब्रुएन हुन् । मोउरिन्हो सन् २०१३ मा चेल्सीका प्रशिक्षक बन्दा डे ब्रुएन क्लबका खेलाडी थिए । तर मोउरिन्होले डे ब्रुएनलाई ३ खेलमा मात्र खेलाए र त्यसपछि आफ्नो टोलीमा समेटेनन । उनले सन् २०१४ मा क्लब छाडे र जर्मन क्लबमा खेले । उनले केहि वर्षपछि नै प्रिमियर लिगमा पुनरागमन गरे । यसपटक पेप गुआर्डीओलाको म्यानचेस्टर सिटीमा उनले विश्वस्तरीय खेलाडीको स्थान बनाए ।