काठमाडौं (हाम्रो खेलकुद) – नेपाली राष्ट्रिय फुटबल टोलीका मिडफिल्डर एवं रुस्लान थ्री स्टार क्लबका कप्तान विक्रम लामा झन्डै ९ महिनापछि चोटबाट पुनरागमन गर्ने सुरमा छन् ।

गत माघमा बुढासुब्बा गोल्डकपको फाइनलमा नेपाल पुलिस क्लबविरुद्ध खेल्दा खुट्टा भाँचिएपछि विक्रम मैदानबाहिर रहेका छन् । त्यसपछि विक्रमले खुट्टाको शल्यक्रिया गरेर रिह्याबमा आफ्नो समय व्यतित गरे । यसबिचमा उनले मोफसलका प्रतियोगितासँगै राष्ट्रिय टोलीबाट बंगलादेशमा भएको साफ च्याम्पियनसिप खेल्न पाएनन् । विक्रम मंसिर १ गतेबाट सुचारु हुने लिगमा पुनरागमन गर्ने सुरमा छन् ।

विक्रमले चोट लागेपछि मैदानमा आउन निकै मिहिनेत गरेको बताए । यसबिचमा उनले प्रतियोगिता खेल्नेभन्दा पनि बल हान्न धेरै मिस गरेको बताए । ‘ चोट लाग्दा व्यक्तिगत रुपमा मैले फुटबल मिस गरें । टिभीमा फुटबल हेर्दा, सामाजिक संजालमा अरुले खेलेको हेर्दा आफूलाई पनि खेलूं लाग्थ्यो । छिट्टै मैदानमा फर्केर आफूलाई मनपर्ने खेल खेल्न मन लागेको थियो,’ उनले भने, ‘मैले मैदान फर्कन केहि समय विश्राममा बिताउनु पर्ने हुनाले मैले आफूलाई त्यसै तयारीमा लाग्न व्यस्त बनाएँ । अहिले म पूर्ण फिट छु र अब मैले गरेको मिहिनेतले नै मेरो पुनरागमन कस्तो हुन्छ भन्ने तय हुन्छ ।’

राष्ट्रिय टोलीमा फर्कने योजनाबारे भने विक्रमले आफ्नो मिहिनेतमा भर पर्ने बताए । ‘ फुटबल खेलाडी भएपछि चन्द्र सूर्य अंकित राष्ट्रिय टोलीको जर्सी लगाउनु सबैको लक्ष्य हुन्छ । म अब पुनरागमनको लागि मिहिनेत गर्छु ।  म खेल्नको लागि फिट भएर राम्रो प्रदर्शन गरे भने पक्कैपनि राष्ट्रिय टोलीमा फर्कनेछु । त्यसको लागि मैले केहि समय प्रतिक्षा गर्नपर्ने हुन्छ,’ लामाले भने ।

लिगको पहिलो खेलमा रुस्लान थ्री स्टारले फ्रेन्ड्स क्लबलाई २-१ ले पराजित गरेको थियो । उक्त खेलमा थ्री स्टारका लागि रन्जन विष्ट र बुद्ध चेम्जोङले गोल गरेका थिए । विक्रमले थ्री स्टार सदाझैं यसपटक पनि लिग उपाधिको लक्ष्यसहित मैदानमा उत्रने बताएका छन् । ‘ थ्री स्टार जहिलेपनि उपाधि दावेदारको रुपमा प्रतियोगितामा जान्छ । यो पनि केहि फरक छैन । हामी उपाधि जित्ने लक्ष्य लिएर नै मैदानमा उत्रनेछौं,’ उनले थपे ।

क्लबका प्रशिक्षक मेघराज केसीले पनि विक्रम पूर्ण रुपमा फिट भएको र उनले छिट्टै मैदानमा फर्कने बताए । ‘ विक्रम फिट भइसकेका छन् । उनले पुनरागमन गर्न निकै मिहिनेत पनि गरेका छन् । अब उनलाई कुन भूमिकामा र कुन खेलमा खेलाउने भन्ने निर्णय लिन बाँकी छ । त्यो आउने दिनमा निर्धारण गर्नेछु,’ उनले भने ।  थ्री स्टारले अब लिगको खेलमा ब्रिगेड ब्वाइजको सामना गर्दैछ ।

प्रशिक्षणका फोटोहरु यहाँ हेर्नुहोस