काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत मनाङ मर्स्याङदी क्लबले शनिबार भएको खेलमा न्यू रोड टिम (एनआरटी) लाई २-० ले पराजित गर्दै शीर्ष स्थानमा स्थान बनायो ।

खेल हुनुभन्दा तीन दिन अगाडी नै प्रशिक्षणमा उपकप्तान सुजल श्रेष्ठलाई हातको चोटका कारण गुमाएको मनाङले एनआरटी विरुद्ध थप समस्या खेप्नुपर्यो । खेलको दोस्रो मिनेटमा नै राजेश परियारको ट्याकलमा विंगर प्रकाश बुढाथोकी घाइते भए । राजेशले मैदानको मध्येभागमा ट्याकल गरेपछि लड्ने क्रममा प्रकाशको ल्यान्डीङ काँधको बलले हुँदा उनको ‘क्लाभिकल बोन’ भाँचिएको छ । उनलाई चिकित्सकले ८ साता आराम गर्ने सल्लाह दिएका छन् ।

प्रकाश बुढाथोकी अस्पतालबाट फर्केपछि

त्यसअघि सुजल पनि प्रशिक्षणका क्रममा विशाल बस्नेतको ट्याकलमा लडेर घाइते हुँदा ६ साता मैदानबाहिर रहेका छन् । मनाङले अब अर्को चरणको खेलमा बिहीबार रुस्लान थ्री स्टार क्लबसँग खेल्दैछ । एन्फा कम्प्लेक्स सातदोबाटोमा हुने खेलका लागि मनाङले फरवार्ड ओलावाले आफिजलाई पनि गुमाउनेछ । आफिजले यसअघि थ्री स्टारबाट खेल्दै राष्ट्रिय लिग जिताउँदा महत्त्वपूर्ण भूमिका निर्वाह गरेका थिए ।

आफिजले लिगको सुरुवाती दुवै खेलमा पहेंलो कार्ड पाएपछि खेल गुमाउने भएका हुन् । पहिलो खेलमा गोल गर्दा भित्रि लुगा देखाएका कारण पहेंलो कार्ड पाएका आफिजले एनआरटीविरुद्ध भने डाइभ हानेको कारण पहेंलो कार्ड पाए । उनलाई रेफ्री श्रावण लामाले पेनाल्टी क्षेत्रनजिक डाइभ हानेपछि पहेंलो कार्ड देखाएका थिए ।

रेफ्री श्रवण लामा आफिजलाई पहेंलो कार्ड देखाउँदै

मनाङका प्रशिक्षक सुमन श्रेष्ठले तीन खेलाडीको अनुपस्थितिमा टोलीलाई केहि असहज हुने स्वीकारे । ‘ तीनैजना खेलाडीको स्तर हामीले मैदानमा देखेका छौं । टोलीलाई केहि घाटा अवश्य हुन्छ । तर हामीसंग बेन्च राम्रो छ । त्यसैले त्यति धेरै असर पर्दैन,’ उनले भने । मनाङले आक्रमणमा यसपटक निकै मोटो रकम खर्चेको छ ।

शनिबार प्रकाश घाइते भएपछि बेन्चबाट विमल रानामगर वैकल्पिक खेलाडीको रुपमा प्रवेश गरेका थिए । उनले एनआरटीविरुद्ध राम्रो प्रदर्शन गरे । उनको दुई प्रहार पोस्टमा लाग्दै बाहिरिएको थियो । त्यस्तै टोलीमा दीपक राई पनि वैकल्पिक खेलाडीका रुपमा रहेका छन् । यसबाहेक अन्जन विष्ट, आडिलेजे सोमिडे, हेमन गुरुङ, विशाल राई, डोना थापालगायतका खेलाडी पनि छन् ।

यो पनि हेर्नुहोस :

अंक तालिका – सहिद स्मारक ए डिभिजन लिग

खेलतालिका र नतिजाहरु – सहिद स्मारक ए डिभिजन लिग