काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत आइतबार दोस्रो खेलमा रुस्लान थ्री स्टार क्लब र ब्रिगेड ब्वाइज क्लब भिड्दै छन् ।

पहिलो खेलमा ललितपुरको अर्को क्लब फ्रेन्ड्सलाई हराउँदै विजयी सुरुवात गरेको थ्री स्टार लगातार दोस्रो जित दर्ता गर्ने सुरमा छ । टोली कप्तान विक्रम लामाको पुनरागमनसँगै थप मजबुत भएको छ । विक्रम पूर्ण फिट भएपनि प्रशिक्षक मेघराज केसीले उनलाई सुरुवातदेखि खेलाउने वा नखेलाउने पक्का गरेका छैनन् । प्लेमेकरको भूमिकामा विक्रमलाई प्रयोग गर्ने भने उनले यसअघि बताएका थिए ।

फरवार्ड रन्जन विष्ट, अजायी मार्टिन्स र अनिल गुरुङलाई सुनील बल र बुद्ध चेम्जोङको साथ मिल्नेछ । यसबाहेक टोलीको बेन्च पनि बलियो नै छ । डिफेन्समा पनि घरेलु फुटबलमा स्थापित नाम छन् । गोलरक्षकमा एलन न्यौपानेले राम्रो प्रदर्शन गर्दै राष्ट्रिय टोलीमा नै नियमित स्थान बनाउन थालिसकेका छन् ।

यता ब्रिगेड ब्वाइजले भने पहिलो खेलमा मनाङविरुद्ध औसत प्रदर्शन मात्र गर्न सक्यो । युवा खेलाडीले भरिपूर्ण टोलीमा यस खेलदेखि विदेशी खेलाडीहरुले खेल्ने अपेक्षा गरिएको छ । थ्री स्टारलाई विदेशी खेलाडीकै भरमा अंक खोस्ने लक्ष्य ब्रिगेड ब्वाइजको हुनेछ । प्रशिक्षक उज्जन श्रेष्ठले मनाङविरुद्ध गरेको गल्ति सच्याउँदै थ्री स्टारलाई रोक्ने लक्ष्य राखेको बताएका छन् । खेल २:३० बजे एन्फा कम्प्लेक्समा हुनेछ ।

यो पनि हेर्नुहोस :

अंक तालिका – सहिद स्मारक ए डिभिजन लिग

खेलतालिका र नतिजाहरु – सहिद स्मारक ए डिभिजन लिग