काठमाडौं (हाम्रो खेलकुद) – पल्सर सहिद स्मारक ए डिभिजन लिगअन्तर्गत आइतबार हुने पहिलो खेलमा नेपाल पुलिस क्लब र मछिन्द्र क्लब भिड्दैछन् ।

पहिलो खेलमा जावलाखेलविरुद्ध १-० को कठिन जित हात पारेको पुलिस फेरी त्यसै नतिजा दोहोर्याउने लक्ष्यसहित मैदानमा उत्रनेछ । चाडबाडको बिचमा नियमित प्रशिक्षण गरेको पुलिसले गतसाता राइनो गोल्डकपमा पनि सहभागिता जनायो । फाइनलमा च्यासलसँग टाइब्रेकरमा पराजित भएको पुलिस लयमा देखिन्छ । आक्रमणमा सुमन लामा र अभिषेक रिजालको जोसले टोलीलाई मजबुत बनाएको छ ।

यता मछिन्द्र भने युवा खेलाडीको भरमा नै लिगमा उत्रिएको छ । केहि अनुभवी खेलाडी भएपनि पहिलो खेलमा उनीहरुको प्रदर्शन अपेक्षित रहेन । पहिलो पटक क्लब सम्हालिरहेका प्रशिक्षक धनेश्वर प्रजापतिले लिगको अघिल्लो खेलमा च्यासललाई रोक्नुलाई सफलता माने । यस अर्थमा मछिन्द्र फेरी एकपटक पुलिसलाई रोक्ने लक्ष्य लिएर नै मैदानमा उत्रनेछ ।

दुवै टोलीले पहिलो खेलमा क्लिन सिट राखेका थिए । पुलिसका लागि अजित भण्डारीले एकमात्र गोल गरेका थिए । उक्त खेलमा पुलिसले आक्रमणमा धेरै अवसर सिर्जना गरेको थियो तर गोल निस्केको थिएन । यता मछिन्द्र भने च्यासलको आक्रमण नचल्दा एक अंक जोड्न सफल भएको थियो । आजको खेल दिनको ११ बजे एन्फा कम्प्लेक्समा हुनेछ ।

यो पनि हेर्नुहोस :

अंक तालिका – सहिद स्मारक ए डिभिजन लिग

खेलतालिका र नतिजाहरु – सहिद स्मारक ए डिभिजन लिग