काठमाडौँ, चैत ११ अखिल नेपाल फुटबल संघ (एन्फा)मा देखिएको दुई पक्षीय विवाद समाधान गर्न राष्ट्रिय खेलकुद परिषद (राखेप)ले स्वतन्त्र समिति निर्माण गर्न पहल गर्ने भएको छ ।
दुईवर्ष देखि एन्फामा विवाद बुझ्न काठमाडौँ आएको एसियाली फुटबल महासंघ (एएफसी)को एक टोलीसँग छलफल गर्दै राखेपले एन्फाको आगामी निर्वाचनसम्मको लागि स्वतन्त्र समिति गठन गर्नुपर्ने राय ब्यक्त गरेको हो ।
एएफसीका अन्तर्राष्ट्रिय सम्बन्ध विभागका निर्देशन सञ्विज बाला सिंघम र अन्तर्राष्ट्रिय सम्बन्ध अधिकारी पुरुषोत्तम कट्टेलको नेतृत्वमा रहेको टोलीसँगको छलफलमा राखेप सदस्यसचिब केशव कुमार बिष्टले दुवै पक्षलाई मान्य हुने समिति गठनको प्रस्ताव लगेका थिए ।
‘एएफसीका प्रतिनिधिहरुले एन्फा विवाद चाडै समाधान होस् भन्ने चाहेको छ ।’ छलफलपछि सदस्यसचिब बिष्टले, ‘एन्फा विवाद टालटुले समाधानले नहुने हामीले कुरा राख्यौ र, विवाद समाधानको लागि दुवै पक्षलाई मान्य हुने एक स्वतन्त्र समिति गठन गर्नुपर्ने कुरा राखेका छौ ।’
उक्त कमिटिले एन्फाको आगामी साधरण सभा सम्मको लागि काम गर्ने कमिटिमा एन्फाका कम सदस्य रहने छ जसमा एन्फाको तदर्थ समिति नरहेको सदस्यसचिब बिष्टले बताए । तर, राखेपको उक्त प्रस्तावमा टोलीले एएफसीमा छलफलपछि मात्र निचोड दिनेछ ।
यसअघि एएफसीको टोलीले बुधबार एन्फाका सस्थापन र असन्तुष्ट पक्षसंग छुट्टा छुट्टै छलफल गर्दै दुवै पक्षलाई साधारण सभामा सहभागी हुदै विवाद समाधान गर्न सुझाव दिएको हो । तर, एन्फाका दुवै पक्ष आ आफ्ना अडानमा छन् ।
