काठमाडौं (हाम्रो खेलकुद) – रुस्लान थ्री स्टार क्लबका पुर्व फरवार्ड एल्भिस सर्फाे अपिया भ्याली च्यासल युथ क्लबमा अनुबन्धित भएका छन् ।

घानाका एल्भिसलाई जारी पल्सर सहिद स्मारक ‘ए’ डिभिजन लिग र मोफसलका केही प्रतियोगितालाई लक्षित गर्दै क्लबमा अनुबन्ध गरेको च्यासल युथ क्लबले जनाएको छ । एल्भिसले यसअघि संकटा क्लबबाट पनि खेलेका थिए । एल्भिसलाई थ्री स्टारले २०७१ मा भएको रेडबुल राष्ट्रिय लिगमा क्लबमा अनुबन्ध गरेको थियो । थ्री स्टारलाई च्याम्पियन बनाउन एल्भिसले पनि महत्वपूर्ण भुमिका निभाएका थिए ।

नेपाली राष्ट्रिय टोलीका फरवार्ड विमल घर्तीमगर ट्रायलका लागि बेल्जियम गएपछि च्यासल फरवार्डको खोजीमा रहेको थियो । एल्भिसले बिमलको स्थान पुर्ति गर्ने व्यवस्थापक शंकर व्यन्जनकारले जानकारी गराए । च्यासलको अर्काे फरवार्डमा थ्री स्टारकै पुर्व फरवार्ड सन्तोष साहुखल रहेका छन् ।

च्यासलले २९ मंसिरमा ब्रिगेड ब्वाइजसँग प्रतिस्पर्धा गर्दैछ । त्यसपछि च्यासलले ३ पुसमा मनाङ–मस्र्याङ्दी तथा ७ पुसमा थ्री स्टारसँग प्रतिस्पर्धा गर्दैछ । सातौं चरणको खेल सकिदा च्यासल १० अंक जोडेर सातौ स्थानमा रहेको छ । च्यासलले ७ खेलमध्ये ३ जित ३ हार र १ बराबरीको नतिजा निकालेको छ ।

च्यासलले यसअघि विदेशी फरवार्ड चीकोलाई अनुबन्ध गरेपनि चोटका कारण उनी अझै दुई महिना मैदान बाहिर रहने भएका छन् । चीकोलाई एन्फामा दर्ता नगराएका कारण क्लबले एल्भिसलाई क्लबमा ल्याउन पाएको हो । ‘ए’ डिभिजनको नवप्रवेशी च्यासलले लिगमा शीर्ष चारभित्र पर्ने लक्ष्य राखेको छ ।