काठमाडौं (हाम्रो खेलकुद) – मनाङ मर्स्याङदी क्लबले पल्सर सहिद स्मारक ए डिभिजन लिग अन्तर्गत मंगलबारको खेलमा भ्याली च्यासल युवा क्लबलाई ३-१ ले पराजित गरेको छ ।
मनाङका लागि फरवार्ड आडिलेजे सोमिडेले १६ औं मिनेटमा अग्रता दिलाए । उनले ओलावाले आफिजले पेनाल्टी क्षेत्रको दायाँ भागबाट दिएको लो क्रसमा ६ यार्ड बक्सनजिकबाट गोल गरेका थिए ।
२० औं मिनेटमा च्यासलका अमिर श्रेष्ठले पेनाल्टी क्षेत्र बाहिरबाट गरेको फितलो प्रहारलाई मनाङका गोलरक्षक विशाल श्रेष्ठले सहजै बचाए । २८ औं मिनेटमा मनाङका हेमन गुरुङको फ्रिकिकमा भिक्टरको हेडर गोलरक्षक दिनेश थापामगरले बचाए ।
५१ औं मिनेटमा च्यासलका एल्भिसको पासमा संजोक राईको प्रहार आकाशियो । ५८ औं मिनेटमा अन्जन विष्टको प्रहार गोलरक्षकले बचाए । ६४औं मिनेटमा ओलावालेको प्रहार गाेलरक्षकले मुस्किलले बचाए ।
७२औं मिनेटमा ओलावाले ओलाडिपोले मनाङको अग्रता बढाए । उनले मैदानको मध्यभागबाट एकल प्रयासमा गोल गरेका थिए । ८७औं मिनेटमा मनाङका वैकल्पिक खेलाडी विमल रानाले गोल गर्दै अग्रता फराकिलो बनाए ।
इन्ज्युरी समयको थप गरिएको पहिलो मिनेटमा पेनाल्टीमार्फत च्यासलका देवेन्द्र तामाङ गोल । आसिफले बक्समा फल गरेपछि च्यासल ले पेनाल्टी पाएको थियो ।
यस जितसँगै मनाङ अंक तालिकाको शीर्ष स्थानमा ३ अंकले अगाडी छ । मनाङको ९ खेलमा २७ अंक रहेको छ ।
