एजेन्सी – बार्सिलोना फरवार्ड लिओनेल मेसीले करिअरमा पाँचौपटक गोल्डेन बुट अवार्ड जितेका छन् । गत सिजन ला लिगमा ३४ गोल गरेका मेसीले युरोपको सर्वाधिक गोलकर्ता बन्दै सो उपाधि जितेका हुन् ।
मेसीले यस उपाधिसँगै पोर्चुगलका क्रिस्टियानो रोनाल्डोलाई पनि उछिनेका छन् । रोनाल्डोले हालसम्म चार पटक मात्र उपाधि जितेका छन् । मेसीले मंगलबार एक कार्यक्रममा उपाधि ग्रहण गर्दै आफ्नो करिअरमा यस्तो सफलता हात पार्न सक्नेबारे पहिले नसोचेको बताए । ‘ मैले सुरुवातमा यो सबसोचेको थिईन । मेरो सपना एक व्यवसायिक फुटबल खेलाडी बन्ने थियो । सफलता हात पार्न सक्छु भन्ने विश्वास थियो, तर यहाँसम्म होइन,’ उनले भने ।
‘ म मेरो काम मन पराउँछु । मिहिनेत गर्न मलाई एकदम मनपर्छ र मेरा सहकर्मीको साथ् यो सबैमा सबैभन्दा महत्त्वपूर्ण छ,’ उनले थपे, ‘ म विश्वकै सर्वोत्कृष्ट टोलीमा रहेको छु । मसंग विश्वका उत्कृष्ट खेलाडी साथमा खेलिरहेका छन् । यसले गर्दा नै मैले व्यक्तिगत उपाधि सहज रुपमा जित्न सकेको छु,’ उनले भने ।
मेसीले च्याम्पियन्स लिगको अन्तिम १६ मा लियोनसँगको खेलबारे पनि बोले । ‘ लियोन ठूलो नाम भएको टोली नभएपनि खेल सहज हुने छैन । म्यान्चेस्टर सिटीविरुद्ध लियोनले गरेको प्रदर्शन हेरेर पनि थाहा हुन्छ । खेल आउन लामो समय छ, अहिले केहि भन्ने अवस्था छैन ,’ उनले भने ।
