काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत बुधबार नेपाल पुलिस क्लब र ब्रिगेड ब्वाइज क्लबको खेल १-१ को बराबरीमा सकिएको छ ।

खेलको पाँचौ मिनेटमा ऋतिक खड्काले गोल गरे । काजिमले उपलब्ध गराएको पासमा ऋतिकले गोलरक्षक अर्पण कार्कीलाई बिट गर्दै गोल गरेपछि ब्रिगेड ब्वाइजले अग्रता लिएको हो । २१औं मिनेटमा अजित भन्डारीको पासमा दिनेश राजवंशीको हेडर डिफेन्डर सुजित बुढाथोकीले क्लियर गरिदिए ।

पहिलो हाफको इन्ज्युरी समयको पहिलो मिनेटमा रवि पासवानको प्रहार गोलरक्षक सागर राय बिट भएपनि रन्दिप पौडेलले गोल लाईनबाट क्लियर गरिदिए । पहिलो हाफमा ब्रिगेड ब्वाइज १-० को अग्रतामा थियो ।

७५ औं मिनेटमा पुलिसले खेलमा बराबरी गोल गर्यो । दिनेश राजवंशीको क्रसमा अभिषेक रिजालको हेडर गर्दै खेल बराबरीमा ल्याए । त्यसको एक मिनेटमै पुलिसले अग्रता लिने मौका गुमायो । रवि पासवानको प्रहार गोलरक्षकले फुस्काएपछि अभिषेक रिजालले गरेको प्रहार गोलरक्षकले बचाए ।

दोस्रो हाफको इन्ज्युरी समयमा अभिषेक रिजालले रवी पासवानको पासमा गरेको प्रहार गोलरक्षकले विफल पारे । यस बराबरीसँगै ब्रिगेड ब्वाइजको ९ खेलमा १ जित र १ बराबरीसँगै ४ अंक भएको छ । पुलिसको ४ जित र ३ बराबरीसँगै १५ अंक पुगेको छ । अंक तालिकामा पुलिस पाँचौ स्थानमा छ ।