काठमाडौं (हाम्रो खेलकुद) – मछिन्द्र क्लबले पल्सर सहिद स्मारक ए डिभिजन लिगमा पहिलो जित दर्ता गरेको छ । शुक्रबारको पहिलो खेलमा मछिन्द्रले सरस्वती युवा क्लबलाई ४-२ ले पराजित गर्दै पहिलोपटक ३ अंक जोडको हो ।
म्यान अफ द म्याच विशाल राई
खेलको चौथो मिनेटमा सरस्वतीले आत्मघाती गोलको सहाराले अग्रता बनाएको थियो । मच्छिन्द्रका सन्जय राजवहाकले कर्नरमा आएको बललाई क्लियर गर्न खोज्दा आफ्नै पोष्टमा गोल गरेका थिए । १८ औं मिनेटमा भासाडिया डाइमान्डेको कर्नरमा कप्तान विशाल राईले हेडरमार्फत गोल गर्दै खेल बराबरीमा ल्याए ।
२३औं मिनेटमा मछिन्द्रका भासाडिया डाइमान्डेले काउन्टरमा गोल गर्दै टोलीलाई अग्रता दिलाए । २५औं मिनेटमा विवेक पन्डितको फ्रिकिमा अनिल गुरुङको हेड गोलमा मच्छिन्द्रले अग्रता दोब्बर पार्यो ।
पहिलो हाफ सकिन ७ मिनेट बाँकी रहँदा फ्रान्सिस ओनेयामाले गोल गरे । उनले भिक्टर अमोबीको क्रसलाई सदुपयोग गर्दै खेलमा फर्कने लक्षण देखाएका थिए । त्यसको एक मिनेटपछि नै सरस्वतीले खेल बराबर गर्ने मौका गुमायो । डिफेन्डर सविन खड्काले वन भर्सेस वनमा गोल गर्न नसक्दा सरस्वती १ गोलले पछाडी नै रहयो ।
दोस्रो हाफको सुरुवाती मिनेटमा पनिसरस्वतीले खेलमा फर्कने मौका गुमायो । भिक्टरकै पासमा फ्रान्सिस गोल गर्नबाट चुके । ५३औं मिनेटमा फ्रान्सिसको भली प्रहार क्रसबारमा लागेर बाहिरियो ।
इन्ज्युरी समयको पहिलो मिनेटमा मछिन्द्रले अर्को गोल थप्यो । विकास राईले पेनाल्टीमा गोल गर्दै मछिन्द्रको जित पक्का गरे । सरस्वतीका सुसन लामाले खामिर गिल्सनलाई पेनाल्टी क्षेत्रभित्र लडाएपछि रेफ्रीले पेनाल्टी दिएका थिए ।
यस जितसँगै मछिन्द्र अंक तालिकाको ११ औं स्थानमा पुगेको छ । मछिन्द्रले १० खेलमा १ जित र ३ बराबरीसहित ६ अंक जोडेको छ । सरस्वती भने १० खेलमा १० अंकसहित नवौं स्थानमा यथावत छ ।
