काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत शुक्रबारको दोस्रो खेलमा हिमालयन शेर्पा क्लब फ्रेन्ड्स क्लबविरुद्ध २-१ ले पराजित भएको छ । दोस्रो हाफमा शेर्पा १० खेलाडीमा सिमित भएपछि फ्रेन्ड्सले गोल गर्दै जित दर्ता गर्यो ।

दुवै गोल खेलको पहिलो हाफमा सम्भव भएको थियो । खेलको २६ औं मिनेटमा शेर्पाका लागि गोहा प्याट्रिक प्रिभाटले सुरुवाती गोल गरेका थिए । कर्ण लिम्बूको थ्रु बलमा प्याट्रिकले पेनाल्टी क्षेत्रभित्र गरेको फितलो प्रहार देव लिम्बूले बचाउने प्रयास गरेपनि पोस्टमा छिरेको थियो । पछाडी पारेको दुई मिनेटमै फ्रेन्ड्सले गोल फर्कायो । सन्जोग महर्जनले उत्कृष्ट फिनिस गर्दै खेल बराबरीमा ल्याए ।

दोस्रो हाफमा दुवै टोलीले गोल गर्ने अवसर पाएपनि त्यसलाई सदुपयोग गर्न सकेनन् । खेलको ८० औं मिनेटमा शेर्पा दश खेलाडीमा सिमित भयो । आशिष गुरुङले सन्जोग महर्जनलाई लात्ती हानेपछि रेफ्रीले दोस्रो पहेंलो कार्ड देखाएका थिए । खेलको ३ मिनेट बाँकी छँदा केहि मिनेटमा नै फ्रेन्ड्सले गोल गर्यो । काउन्टर अट्याकमा फ्रेन्ड्सका जीवन गुरुङले गोल गर्दै अग्रता दिलाए ।

यस जितसँगै फ्रेन्ड्सले १० खेलमा २ जित र २ बराबरीसँगै ८ अंक जोडेको छ । शेर्पा भने १० खेलमा ४ जित र २ बराबरीसँगै १४ अंकमा छ ।