काठमाडौं (हाम्रो खेलकुद) – न्युरोड टिम (एनआरटी) ले राजधानीमा जारी पल्सर सहिद स्मारक ‘ए’ डिभिजन लिग फुटबलमा पहिलो जित दर्ता गरेको छ ।

फाइल फोटो

लिग अन्तरगत शुक्रबार भएको खेलमा एनआरटीले ग्रान्डमास्टर जावलाखेल युथ क्लबलाई २–१ ले पराजित गर्दै लिगमा पहिलो जित दर्ता गरेको हो ।
एनआरटीले जितको स्वाद लिगको १०औं चरणमा पाएको हो । त्यअघि एनआरटीले लिगको पहिलो चरणको खेलमा विभागीय त्रिभुवन आर्मी क्लबलाई २–२ गोलको बराबरीमा रोक्दै १ अंक जोडेयता सबै ८ खेलमा पराजय भोगेको थियो ।

हल्चोकस्थित एपिएफ क्लबको खेल मैदानमा भएको खेलमा एनआरटीलाई लिगमा पहिलो जित दिलाउन कोवासी डिडियर युवे र सुशिल लामाले गोल गरे । जावलाखेलका सुमन डंगोलले १ गोल फर्काए ।

एनआरटीले खेलको ३४औं मिनेटमा कोवासी डिडियर युवेको गोलबाट पहिलो हाफमा १–० को अग्रता बनाएको थियो । ५७औं मिनेटमा सुशिल लामाले गोल गरेपछि एनआरटीले अग्रता दोब्बर बनायो ।

त्यसको २ मिनेटपछि नै जावलाखेलका सुमन डंगोलले गोल गरेपछि खेल २–१ को अवस्थामा पुगेको थियो । त्यसपछि थप गोल निस्कन नसक्दा एनआरटीले लिगमा पहिलो जित दर्ता गर्न सफल भयो ।

जितपछि एनआरटी लिगमा ४ अंक जोडेर पुछारमा यथावत छ । पराजित जावलाखेल ८ अंक जोडेर १०औं स्थानमा यथावत छ ।