काठमाडौं (हाम्रो खेलकुद) – पल्सर सहिद स्मारक ए डिभिजन लिग फुटबल अन्तर्गत रुस्लान थ्री स्टार क्लब र भ्याली च्यासल युवा क्लबको खेल गोलरहित बराबरीमा टुंगिएको छ ।

खेलको चौथो मिनेटमा च्यासलका सन्त बहादुर गुरुङको प्रहार आकासियो । सातौं मिनेटमा थ्री स्टारका रन्जित धिमालको फ्रिकिकमा बुद्व चेम्जोङको हेडर गोलरक्षक दिनेश थापामगरले पञ्च गरेर बचाए । १३औं मिनेटमा च्यासलका सजिन थापामगरले वान भर्सेस वानमा गोल गर्न सकेन ।

१६औं मिनेटमा च्यासलका एल्भिसको प्रहार आकासियो । ४१औं मिनेटमा अमिर श्रेष्ठको फ्रिकिक गोलरक्षक एलेन न्यौपानेले पञ्च गरेर बचाए ।

दोस्रो हाफमा दुवै टोलीले गोल गर्ने केहि अवसर सिर्जना गरेपनि त्यसको सदुपयोग गर्न सकेनन् । ५२ औं मिनेटमा अजायी मार्टिन्सको प्रहार दिनेशले बचाए । ७२ औं मिनेटमा मिक्छेन तामाङको पासमा अल्बर्ट अबाङले गोल गर्न सकेनन् ।

यस बराबरीसँगै थ्री स्टारको उपाधि जित्ने सम्भावना लगभग सकिएको छ । थ्री स्टारले लिगका १० खेलमा ७ जित, २ बराबरी र १ हारसँगै २३ अंक जोडेको छ । थ्री स्टार मनाङभन्दा ४ अंकले पछाडी छ र मनाङले एक खेल कम खेलेको छ । यता च्यासल भने १० खेलमा ४ जित र २ बराबरीसँगै १४ अंक जोडेको छ ।