काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत शुक्रबार त्रिभुवन आर्मी क्लबले सरस्वती युवा क्लबलाई ४-० ले पराजित गरेको छ । आर्मीको जितमा भरत खवासले २ तथा नवयुग श्रेष्ठले १ गोल गरे ।
आर्मीले खेलको सातौं मिनेटमा नै अग्रता लिएको थियो । दिपक गुरुङको क्रसमा नवयुग श्रेष्ठले ६ यार्ड बक्स नजिकबाट हेडरमार्फत गोल गर्दै अग्रता दिलाए । खेलको २९ औं मिनेटमा सरस्वती १० खेलाडीमा सिमित भयो । सुसन लामाले पेनाल्टी क्षेत्रभित्र भरत खवासलाई लडाएपछि रेफ्रीले सुसनलाई दोस्रो पहेंलो कार्ड दिँदै आर्मीलाई पेनाल्टी दिए । कप्तान भरतले पेनाल्टीलाई गोलमा परिणत गर्दै आर्मीको अग्रता दोब्बर पारे ।
दोस्रो हाफको सुरुवातमै आर्मीले अग्रता बढायो । ६२ औं मिनेटमा भरतले व्यक्तिगत दोस्रो गोल गरे । सन्तोष तामाङको फ्रिकिक गोलरक्षक प्रदिप भण्डारीले नियन्त्रणमा लिन नसक्दा आएको रिबाउन्डमा भरतले गोल गरेका थिए । ८० औं मिनेटमा भरतकै मुभमा आर्मीले चौथो गोल गर्यो । उनले गरेको प्रहार सरस्वतीका आलुसोला इब्राहिमलाई लाग्दै गोलमा परिणत भएको थियो ।
८६ औं मिनेटमा सरस्वतीका तिर्थ बस्नेतले एक मिनेटको अन्तरमा दुई मौका गुमाए । उनले वन भर्सेस वन स्थितिमा प्राप्त गरेको दुवै अवसरमा गरेको प्रहारलाई पोस्टको दिशा दिन सकेनन् ।
यस जितसँगै आर्मीले ११ खेलमा ६ जित र २ बराबरीसँगै २१ अंक जोडेको छ । आर्मी चौथो स्थानमा यथावत छ । सरस्वती भने ११ खेलमा ३ जित र १ बराबरीसँगै दशौं स्थानमा नै यथावत छ ।
