काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत शुक्रबारको दोस्रो खेलमा नेपाल पुलिस क्लबले रुस्लान थ्री स्टार क्लबलाई ३-१ ले पराजित गरेको छ । पहिलो हाफमै एक गोलले पछाडी परेपनि पुलिसले उत्कृष्ट पुनरागमन गर्यो ।
खेलको नवाैं मिनेटमा थ्री स्टारका सुनिल बलकाे प्रहार पोस्टभन्दा थाेरै बाहिरियाे । १३अाैं मिनेटमा निराजन खड्काकाे पासमा अल्बर्ट अवाङले हेडर गाेल गर्दै थ्री स्टारलाई अग्रता दिलाए । १९अाैं मिनेटमा रन्जित धिमालकाे फ्रिकिक गाेलरक्षक अर्पण कार्कीले पञ्च गरेर बचाए । २०अाैं मिनेटमा थ्री स्टारका डिफेन्डर पिटर सेगुनकाे गल्तीमा निरकुमार राईले पुलिसका लागि बराबरी गोल फर्काए ।
दोस्रो हाफको सुरुवाती मिनेटमा नै पुलिसले अग्रता लियो । पहिलो मिनेटमा नै विजय धिमालले पेनाल्टी क्षेत्रभित्र ह्याण्ड गरेपछि पुलिसले पेनाल्टी पाएको थियो । उक्त पेनाल्टीमा अभिषेक रिजालले गोल गर्दै पुलिसलाई अग्रता दिलाए । ५७ औं मिनेटमा भोला सिलवालले पुलिसको अग्रता दोब्बर पारे । फितलो डिफेन्सको फाइदा उठाउँदै भोलाले एकल प्रयासमा गरेको उत्कृष्ट प्रहारलाई थ्री स्टारका गोलरक्षक एलन न्यौपानेले बचाउन सकेन ।
खेलको ५ मिनेट समय बाँकी रहँदा थ्री स्टारले खेलमा फर्कने मौका पायो । हेम तामाङले पेनाल्टी क्षेत्रभित्र ह्याण्ड गरेपछि रेफ्रीले पेनाल्टी दिएका थिए । रञ्जित धिमालले प्रहार गरेको पेनाल्टीलाई पुलिसका गोलरक्षक अर्पण कार्कीले डाइभ गर्दै खुट्टाले बचाए ।
यस जितसँगै पुलिस ११ खेलमा ५ जित र ३ बराबरी नतिजासाथ् १८ अंक जोड्दै पाँचौ स्थानमा पुगेको छ । यता थ्री स्टार भने तेस्रो स्थानमा नै अड्केको छ । थ्री स्टारले ११ खेलमा ७ जित, २ बराबरी र २ हार बेहोरेको छ ।
अंक तालिका :
