काठमाडौं (हाम्रो खेलकुद)– टोकियो ओलम्पिक ९सन् २०२०० को महिला फुटबलअन्तर्गत एसियाको प्रारम्भिक छनोट चरण पार गर्न सफल नेपाली टोलीलाई राष्ट्रिय तथा अन्तर्राष्ट्रिय खेलाडी संघ (एनएनआइपिए) ले सम्मान गरेको छ ।

कात्तिक अन्तिममा म्यानम्यारमा भएको छनोट चरण पार गर्दै नेपाली टोली अघिल्लो चरण पुग्न सफल भएको थियो । एनएनआइपिए स्पोर्टस अवार्डका दौरान शुक्रबार महिला टोलीलाई सम्मान गरिएको हो । विभिन्न २९ खेलका उत्कृष्ट खेलाडी सम्मानित भएको अवार्डमा करातेकी अनु अधिकारी र भारोत्तोलनका कमल अधिकारी सर्वोत्कृष्ट खेलाडी घोषित भएका थिए ।

भारोत्तोलनका पूर्व मुख्य प्रशिक्षक पार्थ सारथी सेन गुप्त गजराज स्मृति आदर्श खेल व्यक्तित्वबाट र नेपाल खेलकुद पत्रकार मञ्चका पूर्व अध्यक्ष निरञ्जन राजवंशी एनएनआइपिए खेलकुद पत्रकारिता पुरस्कारबाट सम्मानित भएका थिए ।

छनोटको समूह ‘सी’ मा रहेको नेपाल समूहमा अपराजित अघिल्लो चरण पुग्न सफल भएको थियो । नेपालले भारत, म्यानमार र बंगलादेशसँग समान १–१ गोलको बराबरी खेलेको थियो ।

नेपाल उत्कृष्ट तेस्रो टोलीको रुपमा दोस्रो चरणमा प्रवेश गर्न सफल भएको थियो । उक्त समूहबाट समूहबाट म्यानमार समूह विजेता तथा भारत समूह उपविजेताको रुपमा दोस्रो चरणमा प्रवेश गर्न सफल भएका थिए ।