काठमाडौं (हाम्रो खेलकुद) – ए डिभिजन लिग खेलिरहेको त्रिभुवन आर्मी क्लबलाई अनुशासन कारवाही भन्दै नेपाल आईस तेस्रो सुदूरपश्चिम खप्तड गोल्डकपको आयोजकले यस संस्करणमा सहभागी नगराउने बताएको छ ।

राजधानीमा आइतबार मुख्य प्रयोजन सम्झौता गर्ने कार्यक्रममा संचारकर्मीको प्रश्नमा जवाफ दिँदै आयोजक सुदूरपश्चिम ११ क्लबक अध्यक्ष सुरेश हमालले आर्मीलाई सहभागी नगराउने निर्णय लिएको बताए । उनले प्रतियोगिताको साविक विजेता आर्मीलाई कारवाही स्वरुप यो प्रतियोगितामा सहभागिता नगराउने निर्णय गरेको जानकारी दिए ।

गतवर्ष सर्लाहीमा भएको राजश्री गोल्डकपको खेल दौरान मैदानमै आर्मीका खेलाडीले सुदुरपश्चिमका खेलाडीमाथि हातपात गरेको भन्दै कारवाही स्वरुप यो प्रतियोगितामा सहभागिता नगराइएको अध्यक्ष हमालले बताए । ‘हामीले यो प्रतियोगिताका लागि आर्मीलाई निमन्त्रणा नै गरेनौ । आर्मी राम्रो टोली हो तर, पछिल्लो वर्ष विभिन्न गोल्डकपमा अनुशासन राम्रो देखिएन,’ अध्यक्ष हमालले थपे, ‘जित्दा राम्रो हुने हार्न लाग्दा कुटपिटमा उत्रने आर्मीको व्यवहार मन नपरेकै कारण यो प्रतियोगितामा सहभागिता नगराइएको हो ।’

अध्यक्ष हमालले अर्को वर्ष भने यस निर्णयमा हेरफेर हुन सक्ने बताए । मोफसलकै सर्वाधिक पुरस्कार भएको प्रतियोगिता पुष २३ गतेदेखि सुरु हुँदैछ । कुल अनुमानित बजेट १ करोड ४० लाख रुपैयाँ रहेको प्रतियोगिताको विजेताले २१ लाख १ रुपैयाँ तथा उपविजेताले १० लाख १ रुपैयाँ प्राप्त गर्नेछन् ।

फलोअप :

‘प्रतिबन्ध हैन व्यस्तताका कारण खप्तडमा भाग लिएनौं ‘ – आर्मी