काठमाडौं (हाम्रो खेलकुद) – अखिल नेपाल फुटबल संघ (एन्फा) ले स्विडिस नागरिक योहान कालिनलाई राष्ट्रिय टोलीको मुख्य प्रशिक्षकको रुपमा नियुक्त गर्ने प्रक्रिया अगाडी बढाएको छ । तर प्राविधिक समितिका संयोजक तथा एन्फा उपाध्यक्ष कृष्ण थापाले भने यसबारे अाफू अनभिज्ञ रहेको बताएका छन् ।

थापाले राष्ट्रिय सञ्चारमाध्यमले एन्फाले विदेशी प्रशिक्षक नियुक्ती गर्ने निर्णय सार्वजनिक गरेको देख्दा अाफैं अाश्चर्यचकित परेको बताएका छन् । ‘ मैले विहान पत्रिका हेरेर मात्र यसबारे जानकारी पाएँ । एन्फाले प्राविधिक समितिसँग यसबारे केहि छलफल गरेको छैन । यसरी अाफूखुसी निर्णय गर्ने भए प्राविधिक समिति बन्नुको के अर्थ भयो र ?,’ थापाले भने ।

एन्फा महासचिव इन्द्रमान तुलाधरले भने एन्फाले प्रक्रिया अगाडी बढाएपनि नियुक्ति पक्का नभइसकेको बताए । ‘ हामीले अान्तरिक छलफल गरेका हौं । अब राष्ट्रिय खेलकुद परिषद (राखेप) र युवा तथा खेलकुद मन्त्रालयबाट स्विकृती लिएर अागामी प्रक्रिया बढाउने छौं,’ उनले थपे, ‘ यसअघि अन्य नाम पनि अाएको थियो ‌। हामीले कालिनको नामलाई अगाडी बढाउने निर्णय गरेका हौं ।’

एन्फाले यसअघि बंगलादेशको युवा टोलीका प्रशिक्षक रहिसकेका रेने कोस्टरलाई पनि विकल्पको रुपमा हेरेको थियो । कोस्टर विस्तृत छलफलका लागि नेपाल पनि अाएका थिए । राष्ट्रिय टोलीमा जापानी प्रशिक्षक ग्योतोकु कोजी छँदा नै कोस्टर अन्तर्वार्ताका लागि नेपाल अाएका थिए । यध्यपी कोजीको अनुबन्धन बाँकी रहेकाले एन्फाले नियुक्त गर्न सकेको थिएन ।

एन्फाको प्रशासनिक कमजोरीका कारण कोजीको नेपाली भिसामा समस्या अाएपछि सम्झौता रहँदा नै कोजी जापान फर्केका थिए ‌। कोजीले गत सेप्टेम्बरमा बंगलादेशमा अायोजित साफ च्याम्पियनसिप अघिसम्म टोलीको प्रशिक्षण सम्हालेका थिए । तर प्रतियोगिताका लागि भने एन्फाले बालगोपाल महर्जनलाई जिम्मेवारी दिएको थियो । कोजी साफअघि थाईल्याण्डमा भएको प्रशिक्षण क्याम्पबाट सिधै जापान पुगेका थिए ।

एन्फाको नयाँ कार्यसमितिको निकट मानिएका बालगोपाल पछिल्लो समय कार्यवाहक प्रशिक्षक नै रहेका छन् । राजधानीमा जारी लिग फुटबलमा उनको उपस्थिति ज्यादै कम रहेको छ । एन्फाले लिग दौरान प्राविधिक अध्ययन समिति गठन गरेर खेलाडीहरुको प्रदर्शनलाई विस्तृत अध्ययन भने गरिरहेको छ । कालिनको नियुक्तिसँगै महर्जनको भूमिकाबारे भने एन्फाले केही जानकारी दिएको छैन ।