काठमाडौं (हाम्रो खेलकुद) – अखिल नेपाल फुटबल संघ (एन्फा) ले नयाँ प्रतियोगिताको रुपमा फ्रेन्चाइज लिग ‘नेपाल सुपर लिग’ फुटबल प्रतियोगिता आयोजना गर्ने भएको छ ।
एन्फा अध्यक्ष कर्मा छिरिङ शेर्पा र एनएसएमईका निर्वाण चौधरी
विभिन्न नाममा प्रतियोगिता गर्दै निरन्तरता दिन नसकेको एन्फाले फ्रेन्चाइज लिग ‘नेपाल सुपर लिग’ फुटबल प्रतियोगिताको लागि मंगलबार नेपाल स्पोर्ट्स एण्ड इभेन्ट्स म्यानेजमेन्टसँग सम्झौता हस्ताक्षर गरेको छ । सम्झौतामा एन्फाका अध्यक्ष कर्माछिरिङ शेर्पा र नेपाल स्पोर्ट्स एण्ड इभेन्ट्स म्यानेजमेन्टका अध्यक्ष निर्वाण चौधरीले हस्ताक्षर गरे । सम्झौतापछि नेपाल स्पोर्ट्स एण्ड इभेन्ट्स म्यानेजमेन्टका अध्यक्ष निर्वाण चौधरीले यो एक प्रयास भएको र एन्फासँग जोडिन पाउनु आफ्नो लागि खुशीको कुरा रहेको बताए ।
एन्फाका अनुसार लिगमा सहभागिता जनाउने टिमको नाम, तयारी र प्रायोजकहरु नेपाल स्पोर्ट्स एण्ड इभेन्ट्स म्यानेजमेन्टले हेर्नेछ । एन्फाले नेपाली फुटबलको दिगो विकास र विस्तार गर्न विकेन्द्रीकरण नीति अनुसार उपत्यका बाहिर सातै प्रदेशमा फुटबल विकासका लागि लिग गर्न लागेको जनाएको छ ।
निर्वाण चौधरी
एन्फाको आयोजना तथा नेपाल स्पोर्ट्स एण्ड इभेन्ट्स म्यानेजमेन्टको व्यबस्थापनमा हुने फ्रेन्चाइज लिग प्रादेशिक अवधारणाका आधारमा हुने मंगलबार आयोजित पत्रकार सम्मेलनमा जानकारी गराइएको छ । जसमा ७ प्रदेशले प्रतिस्पर्धा गर्नेछन् । सात प्रदेशले सहभागिता जनाउने भएपनि सहभागिता जनाउने नामको टुङ्गो पछि लाग्ने एन्फाले जनाएको छ ।
फ्रेन्चाइज लिगका लागि एन्फाले हाल १४ ‘ए’ डिभिजन क्लबबाट उत्कृष्ट १४० खेलाडी छनोट गरेर सबै प्रदेशलाई बाड्दै टिम बनाउने बताएको छ । खेलाडीहरु लोनमा फ्रेन्चाइज लिगमा सामेल हुने र फिफाबाट मान्यता लिने प्रक्रिया अघि बढेको एन्फाले जनाएको छ ।
कर्मा छिरिङ शेर्पा
प्रतियोगिता सिंगल राउण्ड रोबिनको आधारमा हुनेछ । जसमा लिगका २१ खेल र प्ले अफका ४ गरी कुल २५ खेल हुने एन्फाले जनाएको छ । लिगमा विदेशी खेलाडीले पनि सहभागिता जनाउन पाउने एन्फाले जनाएको छ । फ्रेन्चाइज लिग बैशाख र जेठमा आयोजना गरिने एन्फाका अध्यक्ष कर्मा छिरिङ शेर्पाले बताए ।
यस्तै एन्फाले नेपाल स्पोर्ट्स एण्ड इभेन्ट्स म्यानेजमेन्टकै व्यबस्थापनमा विद्यालय स्तरीय लिग आयोजना गर्ने समेत जनाएको छ । करिव ३०० विद्यालयबाट उत्कृष्ट ११ टिम छनोट गरी विद्यालय स्तरीय लिग हुनेछ । करिव ६ महिनासम्म सञ्चालन हुने लिगमा कुल ५५ खेल हुने एन्फाले जनाएको छ ।
पंकज विक्रम नेम्वाङ
