काठमाडौं (हाम्रो खेलकुद) – सीएमजी क्लब संकटाले पल्सर सहिद स्मारक ए डिभिजन लिग अन्तर्गत बुधबारको खेलमा रुस्लान थ्री स्टार क्लबलाई पराजित गर्दै लिगको उपविजेता बनेको छ । अमित तामाङले दुवै हाफमा पेनाल्टी दुई गोल गरेपछि संकटा २-१ ले विजयी रहयो ।
संकटा क्लब
थ्री स्टारले खेलको ३० औं मिनेटमा सुरुवाती अग्रता बनाएको थियो । पेनाल्टी क्षेत्रभित्र रन्जन विष्टले दबाबमा रहेको अवस्थामा गरेको फितलो प्रहार गोलरक्षक राजाबाबु थापाले रोक्न नसक्दा संकटा खेलमा पछाडी परेको थियो । पहिलो हाफको २ मिनेट समय बाँकी रहँदा संकटाले खेल बराबरीमा ल्यायो । पेनाल्टी क्षेत्रभित्र सुनिल बलले सौजन राईलाई फल हानेपछि रेफ्रीले पेनाल्टी दिएका थिए ।
दोस्रो हाफको ७७ औं मिनेटमा पनि संकटाले पुन: पेनाल्टी पायो । पिटर सेगुनले सौजन राईलाई पेनाल्टी क्षेत्रको ठिक भित्र लडाएपछि रेफ्रीले पेनाल्टी दिएका थिए । अमितले पेनाल्टीमा कुनै गल्ति नगरी संकटालाई अग्रता दिलाए ।
यस जितसँगै संकटाले १२ खेलमा ९ जित र १ बराबरीको नतिजासँगै २८ अंक बनाएको छ । तेस्रो स्थानको थ्री स्टार भने १२ खेलमा ७ जित र २ बराबरीसँगै २३ अंकमा नै सिमित भयो । उपविजेता बनेसँगै संकटाले ३५ लाख रुपैयाँ प्राप्त गरेको छ ।
