काठमाडौं (हाम्रो खेलकुद) – पल्सर सहिद स्मारक ‘ए’ डिभिजन लिग च्याम्पियन बनिसकेको मनाङ–मस्र्याङ्दी क्लबले लिगको १२औं चरणको खेलमा हिमालयन शेर्पा क्लबलाई २–१ ले पराजित गर्दै कीर्तिमानतर्फ अग्रसर भएको छ ।
हल्चोकस्थित एपिएफको खेल मैदानमा शेर्पालाई पराजित गर्न ओलावाले अफिज र विशाल राईले गोल गरे । शेर्पाका लागि विश्वास श्रेष्ठले एक गोल फर्काए । लिगमा अपराजित रहेको मनाङ अब कीर्तिमान बनाउनबाट एक जित टाढा छ । लिगको अन्तिम खेलमा एनआइविएल फ्रेन्डस् क्लबलाई पराजित गर्न सके मनाङले शतप्रतिशत जितको नतिजासहित च्याम्पियन बन्नेछ ।
यसअघि नेपाल पुलिस क्लबले अपराजित रहँदै लिगको जितेको इतिहास रहेको थियो । फ्रेन्डस्विरुद्धको खेलमा बराबरीमा रोकिए मनाङले पुलिससँगको कीर्तिमानसँग बराबरी गर्नेछ ।
प्रतिपर्धात्मक बनेको खेलको पहिलो हाफ १–१ गोलको बराबरीमा सकिएको थियो ।
३६औं मिनेटमा ओलावाले अफिजले गोल गर्दै मनाङलाई सुरुवाती अग्रता दिलाएका थिए । ४५औं मिनेटमा विश्वास श्रेष्ठले गोल गर्दै शेर्पालाई खेलमा फर्काएका थिए । ५३औं मिनेटमा विशाल राईले गोल गरेपछि मनाङले खेलमा २–१ को अग्रता बनायो ।
खेलको ६९ अौं मिनेटमा शेर्पाका विश्वास श्रेष्ठ र मनाङका मोहमद आरिफ रातो कार्ड खाँदै बाहिरिएपछि दुवै टोली १० खेलाडीमा सिमित भएका थिए ।
त्यसपछि थप गोल निस्कन नसक्दा मनाङ लिगमा १२औं खेलसम्म अपराजित रहन सफल भयो ।
मनाङको १२ खेलबाट ३६ अंक पुगेको छ । पराजित शेर्पा १७ अंकसहित तालिकाको सातौं स्थानमा छ ।
