लमजुङ (हाम्रो खेलकुद) – बिवाईसी भोटेवडार र कास्की–११ लमजुङमा जारी २७औं त्रिवेणी कप राष्ट्रव्यापी खुल्ला पुरुष फुटबल प्रतियोगिताको सेमिफाइनलमा प्रवेश गरेका छन् । कास्की–११ ले नखिपोट युथ क्लब ललितपुरलाई तथा बिवाईसीले सामना युथ क्लब तुरतुरे तनहुलाई पराजित गर्दै अन्तिम चारमा पुग्न सफल भएको हो ।

लमजुङ सदरमुकाम वेशीसहरस्थित सहजी खेल मैदानमा बुधबार भएको पहिलो क्वाटरफाइनलमा कास्की–११ ले अधिकांश ‘ए’ डिभिजन लिगका खेलाडी सम्मिलित नखिपोटलाई १–० ले पराजित गर्दै अन्तिम चारमा पुग्न सफल भएको हो । कास्कीको जितमा रोसन केसीले पहिलो हाफमा गरेको गोल नै निर्णायक बन्यो । उनले पेनाल्टीमार्फत पहिलो गोल गरेका थिए । नखिपोटले बराबरी गोल गर्ने मौका खेर फालेको थियो । पहिलो हाफमै नखिपोटका योगेश गुरुङको पेनाल्टी प्रहार क्रसबारमा लाग्दै बाहिरिएको थियो । त्यसपछि नखिपोटले खेललाई आफ्नो नियन्त्रणमा राखेपनि गोल गर्न नसक्दा पराजित हुन पुग्यो ।

बुधबारै भएको दोस्रो क्वाटरफाइनलमा बिवाईसी भोटेवडारले सामना युथ क्लब तुरतुरे तनहुलाई पेनाल्टी सुटआउटमा ४–२ ले पराजित गर्दै अन्तिम चारम पुग्न सफल भयो । निर्धारित र थप गरिएको समयमा कुनै गोल निस्कन नसकेपछि खेलको निर्णय पेनाल्टी सुटआउटबाट लिइएको हो ।

प्रतियोगिताअन्तर्गत बिहिबार सेमिफाइनलका दुई खेल हुने आयोजकले जनाएको छ । दिनको पहिलो खेलमा कास्की–११ ले आयोजक त्रिवेणी सेतोसँग प्रतिस्पर्धा गर्दा बिवाईसी भोटेवडारले सुन्दरबजार फुटबल क्लबको सामना गर्नेछ । प्रतियोगिताको विजेताले ३ लाख रुपैया प्राप्त गर्नेछन् । दोस्रो हुनेले १ लाख ५० हजार तथा सेमिफाइनलमा पराजित हुने टोलीले समान ५०–५० हजार रुपैया प्राप्त गर्ने आयोजकले जनाउको छ । प्रतियोगिताको सर्वाधिक गोलकर्ता र सर्वोत्कृष्ट खेलाडीले जनही १५–१५ हजार रुपैयाँ पाउनेछन् ।