इतिहाद (एजेन्सी) – इंग्लिस प्रिमियर लिग क्लब म्यानचेस्टर सिटीले एफए कपको तेस्रो चरणमा रोधरह्याममाथि ७–० को फराकिलो जित निकालेको छ ।
घरेलु मैदान इतिहाद स्टेडियममा आइतबार भएको खेलमा च्याम्पियनसिप क्लब रोधरह्याममाथिको सिटीको फराकिलो जितमा सात खेलाडीले गोल गरे ।
सिटीका रहिम स्ट्रलिङ, फिल फोडेन, गाब्रियल जेसस, रियाद महारेज, निकोलस ओटामेन्डी र लिरोए सानेले गोल गर्दा एक गोल सेमि अजायीबाट आत्मघाती गोल उपहार पाएको थियो ।
एकपक्षीय बनेको खेलमा सिटीले खेलको १२औं मिनेटमा रहिमको गोलबाट अग्रता बनाएको थियो । ४३औं मिनेटमा फिल फोडेनले गोल गरेपछि सिटी २–० ले अघि बढेको थियो । ४५औं मिनेटमा रोधरह्यामका सेमिले आत्मघाती गोल गरेपछि सिटी पहिलो हाफमै ३–० ले अघि रहेको थियो ।
५३औं मिनेटमा गाब्रियल जेससले गोल गरे । ७३औं मिनेटमा रियाद महारजेलले गोल गरेपछि सिटीले खेलमा ५–० को अग्रता बनायो । ७८औं मिनेटमा निकोलस ओटामेन्डीले तथा ८५औं मिनेटमा लिरोए सानेले गोल गरेपछि सिटीले रोधरह्याममाथि ७–० को फराकिलो जित निकाल्यो ।
जितसँगै सिटी एफए कपको चौथो चरणमा पुग्न सफल भएको छ ।
यस्तै मिलवालले हल सिटीलाई तथा क्वीन्स पार्क रेन्जर्स (क्युपिआर) ले लिड्स युनाइटेडलाई समान २–१ ले पराजित गर्दै एफए कपको चौथो चरणमा प्रवेश गर्न सफल भएका छन् ।
