एजेन्सी – इंग्लिस प्रिमियर लिग फुटबलमा यस सिजन उपाधि दौडमा रहेको लिभरपुल एफए कपको तेस्रो चरणबाट बाहिरिएको छ ।

एफए कप अन्तरगत सोमबार राति भएको खेलमा लिभरपुल प्रिमियर लिग प्रतिद्धन्द्धी वल्भ्ससँग २–१ ले पराजित हुदै एफए कपको तेस्रो चरणबाटै बाहिरिएको हो । लिभरपुलले वल्भ्सविरुद्धको खेलमा अधिकांश युवा खेलाडीहरुलाई मौका दिएका थियो । पहिलो रोजाईमै ९ खेलाडी परिवर्तन भएको थियो ।

वल्भ्सको मैदानमा भएको खेलमा घरेलु टोलीले पहिलो हाफमा १–० को अग्रता बनाएको थियो । ३८औं मिनेटमा राहुल जिमिनेजले डिएगो जोटाको पासमा गोल गर्दै घरेलु टोलीलाई अगाडि बढाएका थिए ।

दोस्रो हाफको ५१औं मिनेटमा डिभोक ओरिजीले गोल गर्दै लिभरपुललाई खेलमा फर्काउने संकेत दिएका थिए । तर, त्यसको चार मिनेटपछि रुवेन नेभेसले सुन्दर गोल गर्दै घरेलु टोलीलाई २–१ ले अघि बढाए । उनले करिव ३० यार्डबाट गरेको प्रहार दर्शनीय रुपमा गोलमा परिणत भएको थियो ।

त्यसपछि थप गोल निस्कन नुसक्दा वल्भ्स २–१ ले विजयी हुदै चौथो चरणमा प्रवेश गर्दा लिभरपुल तेस्रो चरणबाटै बाहिरियो । जर्गेन क्लोपको लिभरपुलले लगातार दोस्रो हार बेहोरेको हो । यसअघि लिभरपुल प्रिमियर लिगमा म्यानचेस्टर सिटीसँग पराजित भएको थियो ।