काठमाडौं (हाम्रो खेलकुद)- पल्सर सहिद स्मारक ए डिभिजन लिग च्याम्पियन  सिग्नेचर मनाङ मस्र्याङ्दी क्लब अन्तिम खेलमा  पराजित भएको छ ।

अन्तिम खेलमा आज फ्रेण्ड्स क्लबसँग १-० ले पराजित भएपछि च्याम्पियन मनाङले नयाँ कीर्तिमान बनाउन सकेन । यसअघि लगातार १२ खेल जितेको मनाङले अन्तिम खेल पनि जित्दै सबै खेल जितेर लिग उपाधि जित्ने नयाँ कीर्तिमान बनाउने योजना बनाएको थियो ।

तर अन्तिम खेलमा फ्रेण्ड्स त्यसको बाधक बन्यो । इन्जुरी टाइमको छैटौं मिनेटमा विकास लामाले गोल गरेपछि फ्रेण्ड्सले मनाङलाई स्तब्ध बनाएको हो । उनले अनिल महर्जनको फ्रिकिकमा गोल गरेका थिए ।

सातदोबाटोस्थित एन्फा कम्प्लेक्स मैदानमा भएको खेलमा मनाङलाई फ्रेण्ड्स १-० ले हरायो । लगातार ११ खेल जित्दै दुई खेल अगावै लिगको उपाधि पक्का गरेको मनाङको अन्त्य भने सुखद हुन सकेन ।

मनाङले दोस्रो हाफमा  पटक पटक अवसर पाएपनि सदुपयोग गर्न सकेन । पहिलो हाफको इन्जुरी टाइममा आफिज ओलावाले गरेको गोल अफसाइड भएको थियो ।

च्याम्पियन मनाङले लिगको ट्रफीसँगै नगद ५० लाख पुरस्कार समेत पक्का गरेको छ । यस्तै मनाङले म्याच फि को रुपमा १२ खेलबाट ६ लाख पाएको छ। एन्फाले प्रत्येक खेलको विजेता टिमलाई नगद ५० हजार दिने घोषणा गरेको थियो ।

लिगको ६ दशक भन्दा लामो इतिहासमा मनाङ सर्वाधिक सफल टोली हो । टोलीको यो आठौं लिग उपाधि हो । घरेलु लिगमा आठ पटक लिग जित्ने मनाङ एक्लो टोली हो । अहिले बी डिभिजनमा रहेको आरसिटीले ६ पटक तथा रुस्लान थ्री स्टार क्लब र न्यूरोड टिम एनआरटीले समान ४ पटक लिग उपाधि जितेका छन् । मनाङले यसअघि २०४३, २०४४, २०४६, २०५७, २०६०, २०६२ र २०७० मा ए डिभिजन लिग जितेको थियो ।

यस सिजन उत्कृष्ट प्रदर्शन गर्दै थ्री स्टार, पुलिस जस्ता क्लबलाई हराएको संकटा भने उपविजेता बनेको छ । संकटाले नगद ३५ लाख हात पार्नेछ। १३ मध्ये ८ खेल जितेको संङ्कटाले पनि म्याच फि ४ लाख पाएको छ । यस्तै उपाधि दाबेदार मानिएका थ्री स्टार र आर्मी भने क्रमश: तेस्रो र चौथो भए ।

पल्सर सहिद स्मारक ए डिभिजन लिगमा कसले कति पाए?

मनाङ (च्याम्पियन) : ५० लाख रुपैयाँ

संकटा (दोस्रो) : ३५ लाख रुपैयाँ

थ्री स्टार (तेस्रो) : २५ लाख रुपैयाँ

आर्मी (चौथो) : १५ लाख रुपैयाँ

एपीएफ (पाँचौ) : ७ लाख रुपैयाँ

पुलिस (छैटौँ) : ५ लाख रुपैयाँ

विधागत उत्कृष्ट पाँच जनाले एक-एक थान पल्सर मोटरबाइक हात पार्नेछन् भने फेयर प्ले अवार्ड अनुशासित टिमले पाउनेछ ।