वीरगन्ज (हाम्रो खेलकुद) – झापा–११ फुटबल क्लब वीरगन्जमा जारी दोस्रो विशाल मेमोरियल गोल्डकप प्रतियोगिताको सेमिफाइनलमा प्रवेश गरेको छ । पाँचथरमा सोमबार फाल्गुनन्द गोल्डकपको च्याम्पियन बनेको झापाले भारतको रोयल एफसी सिलगुडीलाई ४–२ ले पराजित गर्दै अन्तिम चारमा पुग्न सफल भएको हो ।
वीरगन्जको नारायणी रंगशालामा मंगलबार भएको खेलमा झापाले खेलको सातौ मिनेटमा नै आशिष चापागाईंको गोलबाट अग्रता बनाएको थियो । पहिलो हाफको २३ औं मिनेटमा आशिषले पेनाल्टीमार्फत गोल गर्दै अग्रता दोब्बर पारे ।
दोस्रो हाफको ६०औं मिनेटमा सिलगुडीका सिद्धान्त क्षेत्रीले गोल गरेपछि खेल २–१ को रोमाञ्चक मोडमा पुगेको थियो । लगत्तै झापाका शक्ति राईले गोल गर्दै खेललाई ३–१ को अवस्थामा ल्याएका थिए । ७५ औं मिनेटमा करण राईले गोल गर्दै सिलिगुडीलाई खेलमा फर्काए । तर, ७९ औं मिनेटमा विकास लिम्बूले गोल गरेपछि झापा ४–२ ले विजयी हुन सफल भयो ।
सेमिफाइनलको पहिलो खेल वीरगन्ज–११ र काठमाडौको हिमालयन शेर्पाका बीच हुने फाउन्डेशनका अध्यक्ष अनिल प्रसाद कलवारले बताए । नेपाल र भारतका ८ वटा टिम सहभागी प्रतियोगिताको विजेताले नगद ५ लाख ५५ हजार र उपविजेताले २ लाख ७७ हजार नगद पुरस्कार र शिल्ड प्राप्त गर्नेछन् ।
