एजेन्सी – स्विडिस सुपरस्टार ज्लाटन इब्रहिमोभिचले क्रिस्टियानो रोनाल्डो युभेन्ट्स जानु चुनौतीपूर्ण निर्णय नभएको बताएका छन् । इब्रहिमोभिचले रोनाल्डोले युभेन्ट्सको अग्रपंक्ति सम्हाल्नु सामान्य विषय रहेको अभिव्यक्ति दिएक हुन् ।
सिजनको सुरुवातमा रियल म्याड्रिड छाडेर इटालियन क्लब युभेन्ट्स आएका रोनाल्डोले २५ खेलमा १५ गोल गरेका छन् । १ सय मिलियन पाउण्डमा युभेन्ट्स आएका रोनाल्डोले करिअरमा नयाँ चुनौतीको सामना गर्न युभेन्ट्स आएका बताएका थिए । इब्राहिमोभिचले रोनाल्डोले असली चुनौती चाहेको भए कमजोर टोलीमा जानुपर्ने बताएका हुन् ।
‘रोनाल्डोले नयाँ चुनौती खोज्ने भन्दै लगातार इटालियन लिगको उपाधि जितिरहेको टोलीलाई रोजे । युभेन्ट्सले लगातार लिग उपाधिसँगै अन्य प्रतियोगितामा पनि राम्रो प्रदर्शन गरिरहेको छ,’ इब्राले थपे, ‘उनले साँच्चै चुनौती चाहेको भए केहि वर्ष अगाडी दोस्रो श्रेणीको टोली रोज्नुपर्थ्यो । उक्त क्लबलाई विजयी बनाएर सफलता हात पार्नुपर्थ्यो । युभेन्ट्स जानु कुनै चुनौती होइन ।’
रोनाल्डोले इटालियन क्लब गएपछि मेसीलाई पनि आफूले जस्तै नयाँ चुनौतीको सामना गर्न भनेका थिए । रोनाल्डोले आफूले अन्य देशको लिगमा प्रमाणित गरेको र मेसीले पनि सोहि किसिमको यात्रा तय गर्न भनेका थिए । त्यसको जवाफमा मेसीले आफ्नो करिअर बार्सिलोनामा नै सक्ने बताएका थिए ।
इब्राहिमोभिचले भने लामो समयदेखि क्रिस्टियानो रोनाल्डोलाई लिएर फरक अभिव्यक्ति दिंदै आएका छन् । उनले डिसेम्बरमा आफ्नो रोजाइको सर्वश्रेष्ठ ११ रोज्दा रोनाल्डोलाई टोलीमा समावेश गरेका थिएनन् । उनले पोर्चुगलका कप्तान समेत रहेका रोनाल्डोलाई प्राकृतिक रुपमा क्षमता नभएको खेलाडीको संज्ञा दिएका थिए ।
