सिमरा (हाम्रो खेलकुद) – आयोजक नवजनजागृति युवा क्लबले सिमरामा सुरु भएको रुस्लान सिमरा गोल्डकपको दशौं संस्करणमा विजयी शुरुवात गरेको छ ।

घरेलु मैदानमा स्थानिय यूवा खेलाडीले भरिएको नवजनजागृतिले मकवानपुर ११ हेटौंडालाई ३–० ले पराजित गरेको छ । घरेलु टोलीको जितमा निरज थापामगरले २ र प्रज्वल थापामगरले अर्को गोल गरे ।

पहिलो हाफ गोल रहित बराबरीमा टुंगिएपनि दोश्रो हाफमा मकवानपुरमाथि आयोजक सिमरा हावी भयो । ४६ औं मिनटमा आयोजकका सुरज ठकुरीले हानेको फ्रिकिक मकवानपुरका गोलरक्षक अनिष देउलाले समहाल्न नसक्दा आयोजकले अग्रता लियो । गोलरक्षक अनिषले पञ्च गरेको रिवाउण्ड बललाई निरजले गोलमा परिणत गरे ।

खेलको ६० औं मिनटमा आयोजकका लागि प्रज्वलले अग्रता दोव्वर पारे । मकवानपुरका डिफेण्डरले क्लिएर गर्न नसकेको बल डिबक्स भित्रै खोस्न सफल प्रज्वलले सहजै गोल गरे । ७१ औं मिनटमा मोहित गुरुङको क्रसमा निरजले व्यक्तिगत दोश्रो गोल गर्दै टिमको जित सुनिश्चित गरे ।

जितपछि आयोजकका प्रशिक्षक सोनु क्षेत्रीले स्थानिय खेलाडीले भरिएको टिमको प्रदर्शनबाट आँफू खुसी रहेको बताए । दुइदिन अघि वीरगञ्जमा त्रिभूवन आर्मींसंग भोगेको पराजयले कमजोरी पहिल्याउन मद्दत गरेकाले मकवानपुर विरुद्ध खेल्न सहज भएको क्षत्रीले बताए ।

मकवानपुरका प्रशिक्षक विजयलाल श्रेष्ठले दोश्रो हाफमा आक्रामक खेल्न खोज्दा पराजय बेहोर्नु परेको बताए । जुनियर खेलाडी रहेको टिमको प्रदर्शन सञ्तोषजनकनै रहेको श्रेष्ठले बताए ।

म्यान अफ दी म्याच आयोजक टोलीका निरजले १० हजार रुपैयाँ प्राप्त गरे । प्रतियोगितामा शुक्रबार विशाल मेमोरियल फाउण्डेशन वीरगञ्ज र सशस्त्र प्रहरीको एपिएफ क्लबबीच प्रतिस्पर्धा हुनेछ ।

यसअघि युवा तथा खेलकुद मन्त्री जगतबहादुर विश्वकर्माले प्रतियोगिताको उद्घाटन गरेका थिए । १२ माघ सम्म चल्ने प्रतियोगितामा ए डिभिजनका ७ सहित १० टोलीको सहभागिता छ । प्रतियोगिताको विजेताले ६ लाख र दोस्रो टोलीले ३ लाख रुपैयाँ प्राप्त गर्नेछ ।