सुनिल गाँउले
सिमरा – रुस्लान थ्री स्टार क्लबले पहिलो पटक रुस्लान सिमरा गोल्ड कप फुटबल प्रतियोगिताको उपाधि जित्दा व्यक्तिगत उपाधिमा पनि सोही क्लबका खेलाडी र प्रशिक्षकको दबदबा रह्यो ।

त्रिभुवन आर्मी क्लबसँग निकै प्रतिस्पर्धात्मक रहेको खेलमा थ्री स्टारले सडन डेथमा पुगेर खेल आफ्नो पक्षमा पारेको थियो । निर्धारित ९० मिनेटको खेल गोलरहित बराबरीमा टुंगिएपछि खेल टाइब्रेकरमा गएको थियो ।

पेनाल्टी सुट आउटमा पनि ४–४ को बराबरीपछि सडन डेथमा थ्री स्टार ७–६ ले विजयी भयो । ६–६ को बराबरीपछि आर्मीका सुमन अर्यालको प्रहार थ्री स्टारका गोलकिपर एलन न्यौपानेले रोके । त्यसपछि रञ्जन विष्टले गोल गर्दै थ्री स्टारलाई पहिलो पटक सिमरा गोल्ड कप जिताउन भूमिका खेले । यो थ्री स्टारको पहिलो उपाधि हो ।

थ्री स्टारका शुसिल राई प्रतियोगिताका सर्वोत्कृष्ट खेलाडी घोषित भए र उनले यामाहाको मोटरसाइकल जिते । पेनाल्टी र सडन डेथमा ३ पेनाल्टी रोक्दै म्यान अफ दी फाइनल समेत बेको थ्री स्टारका एलन उत्कृष्ट गोलकिपर, आडामा डाम्बिया उत्कृष्ट रक्षक र मेघराज केसी उत्कृष्ट प्रशिक्षक घोषित भए ।

आर्मीका सन्तोष तामाङ उत्कृष्ट मिडफिल्डर, आर्मीका टंक बस्नेत उत्कृष्ट फरवार्ड घोषित भए । आयोजक नवजनजागृति क्लब फेयर प्ले टोली घोषित हुँदा सोही टोलीका निकेश थापा उदयीमान खेलाडी बने । उत्कृष्टले जनही २० हजार र उदयीमानले १५ हजार रुपैयाँ प्राप्त गरे ।

१० औं सिमरा गोल्डकपका उत्कृष्ट

सर्वोत्कृष्ट खेलाडी – शुसिल राई (थ्री स्टार)
उत्कृष्ट गोलकिपर – एलन न्यौपाने (थ्री स्टार)
उत्कृष्ट रक्षक – आडामा डाम्बिया (थ्री स्टार)
उत्कृष्ट मिडफिल्डर – सन्तोष तामाङ (आर्मी )
उत्कृष्ट फरवार्ड – टंक बस्नेत (आर्मी)
उत्कृष्ट प्रशिक्षक – मेघराज केसी (थ्री स्टार)
उदयीमान खेलाडी – निकेश थापा (नवजनजागृति)
फेयर प्ले – नवजनजागृति युवा क्लब

सिमराका सर्वोत्कृष्ट खेलाडी

पहिलो संस्करण – नीराजन खड्का
दोस्रो संस्करण – एकिर
तेस्रो संस्करण – विसन गौचन
चौथो संस्करण – शिव श्रेष्ठ
पाँचौं संस्करण – विजय गुरुङ
छैटौं संस्करण – नवयुग श्रेष्ठ
सातौं संस्करण – विमल रानामगर
आठौं संस्करण – विजय गुरुङ
नवौं संस्करण – दिनेश हेमजन
दसौं संस्करण – शुसिल राई