पोखरा (हाम्रो खेलकुद) – विभागीय नेपाल पुलिस क्लब पोखरामा जारी छैटौ मनकामना केबलकार पोखरा कप फुटबल प्रतियोगिताको क्वाटरफाइनलमा प्रवेश गरेको छ ।

शनिबार भएको अन्तिम प्रि–क्वाटरफाइनलमा खेलमा पुलिसले सिएमजी क्लब संकटालाई २–१ ले पराजित गर्दै प्रतियोगिताको अन्तिम आठमा पुग्न सफल भएको हो । पुलिसले खेलमा पछि परेको स्थिति उल्ट्याएर २–१ को जित निकालेको हो ।

पोखरा रंगशालामा भएको प्रतिस्पर्धात्मक खेलमा संकटाले एलोन म्याक्सवेलको गोलबाट खेलको ११औं मिनेटमा अग्रता बनाएको थियो । ३१औं मिनेटमा अभिषेक रिजालले गोल गर्दै खेललाई १–१ को बराबरीमा ल्याएका थिए ।

५४औं मिनेटमा रवि पासवानले गोल गर्दै पुलिसलाई २–१ ले अघि बढाए । त्ससपछि थप गोल निस्कन नसक्दा तेस्रो संस्करणको च्याम्पियन पुलिस क्वाटर फाइनलमा पुग्न सफल भयो ।

आइतबार पहिलो क्वाटरफाइनलमा रुस्लान थ्री स्टार क्लब र नेपाल एपीएफ क्लबबीच खेल हुने आयोजक एन्फा कास्कीले जनाएको छ । प्रतियोगितामा दुई विदेशी टिमसहित १२ टोलीको सहभागिता रहेको छ।

दुई विदेशी टोलीमा जापानको रिस्से विश्व विद्यालय र क्यामरुनको दाफिनास फुटबल टोली रहेका छन् । नेपालका मनाङ–मस्र्याङदी, संकटा, थ्री स्टार, त्रिभुवन आर्मी, नेपाल पुलिस, एपीएफ, हिमालयन शेर्पा, च्यासल, ब्रिगेड ब्वाइज र आयोजकको पोखरा–११ रहेका छन् ।

विजेताले ७ लाख ५५ हजार र उपविजेताले ४ लाख ५ हजार रुपैयाँ पुरस्कार प्राप्त गर्नेछन् । उत्कृष्ट खेलाडीलाई मोटरसाइकल प्रदान गरिनेछ । पाँच विधाका उत्कृष्ट खेलाडीले जनही २५ हजार पाउने छन् ।