एजेन्सी – फरवार्ड क्रिस्टियानो रोनाल्डोले दुई गोल गरेपनि युभेन्टसले इटालियन सिरी ‘ए’ फुटबलमा पार्मासँग ३–३ गोलको बराबरी खेलेको छ ।

युभेन्टसका लागि अर्को गोल ड्यानियल रुगानीले थपे । पार्माका जेरभिन्होले दुई तथा एन्टेनियो बारिल्लाले एक गोल थपे । युभेन्टसको घरेलु मैदानमा शनिबार राति भएको खेलको ३६औं मिनेटमा रोनाल्डोल गोल गर्दै घरेलु टोलीलाई पहिलो हाफमा १–० को सुरुवाती अग्रता दिलाए ।

६२औं मिनेटमा ड्यानियल रुगानीले गोल गरेपछि युभेन्टस्ले २–० को अग्रता बनायो । त्यसको दुई मिनेटपछि पर्माका एन्टेनियो बारिल्लाले गोल गर्दै पर्मालाई खेलमा फर्काउने संकेत दिए । पुनः दुई मिनेटपछि नै रोनाल्डोले व्यक्तिगत दोस्रो तथा टिमका लागि तेस्रो गोल गर्दै युभेन्टसलाई ३–१ ले अघि बढाए ।

७४ औं मिनेटमा जेरभिन्होले गोल गर्दै पर्मालाई ३–२ को अन्तरमा ल्याए । इन्ज्युरी समयको थप गरिएको तेस्रो मिनेटमा जेरभिन्होले गोल गर्दै खेललाई ३–३ गोलको बराबरीमा ल्याए ।

यससँगै पर्माले युभेन्टसबाट अंक खोस्न सफल भयो । बराबरीपछि शीर्षस्थानमा रहेको युभेन्टसको २२ खेलबाट ६० अंक पुगेको छ । युभेन्टसले दोस्रो स्थानको नेपोलीलाई ९ अंकले पछि पारेको छ । पार्मा २९ अंक जोडेर १२औं स्थानमा यथावत छ ।