काठमाडौं (हाम्रो खेलकुद) – सहिद स्मारक ए डिभिजन लिग च्याम्पियन सिग्नेचर मनाङ मर्स्याङदी क्लबले लिग विजेताको हैसियतले यस वर्षको एएफसी कप खेल्दैछ ।
प्रतियोगिताको समूह ‘ई’ मा रहेको मनाङले बंगलादेशको अबहानी लिमिटेड, भारतको मिनेर्भा पन्जाब र दक्षिण एसियाली प्लेअफको विजेतासँग प्रतिस्पर्धा गर्दैछ । प्लेअफमा भारत, भुटान र श्रीलंकाका क्लबहरु प्रतिस्पर्धा गर्दैछन् । मनाङले समूह चरणको खेलमा तीन होम र तीन अवे खेल खेल्नेछ ।
प्लेअफको पहिल चरणमा श्रीलंकाको कोलोम्बो फुटबल क्लब र भुटानको ट्रान्सपोर्ट युनाइटेडले दुई लेगको खेलमा खेल्दैछन् । पहिलो लेग २० फेब्रुअरी र दोस्रो लेग २७ फेब्रुअरीलाई तोकिएको छ । उक्त खेलको विजेताले ६ मार्च र १३ मार्चमा हुने दुई लेगको खेलमा भारतको चेन्नाईयन फुटबल क्लबको सामना गर्नेछ । उक्त खेलको विजेताले समूह ‘ई’ मा स्थान बनाउनेछ ।
मनाङले प्रतियोगिताको लागि एन्फा कम्प्लेक्सलाई घरेलु मैदान रोजेको छ । एएफसीले पनि प्रतियोगिताको लागि यस मैदानलाई हरियो झण्डा देखाइसकेको एन्फाले जनाएको छ । मनाङले पहिलो खेल ३ अप्रिलमा बंगलादेशको अबहानीविरुद्ध घरेलु मैदानमा खेल्नेछ । दोस्रो खेल मनाङले १७ अप्रिलमा प्लेअफमा जित्ने टोलीको घरेलु मैदानमा खेल्नेछ ।
तेस्रो खेलका लागि मनाङले १ मेमा मिनेर्भा पन्जाबको घरेलु मैदान कालिंगा रंगशालाको भ्रमण गर्नेछ । चौथो खेलमा भने मनाङले १५ मेमा मिनेर्भालाई निम्तो दिनेछ । १९ जुनमा हुने पाँचौ खेलका लागि मनाङ अबहानीको सामना गर्न बंगलादेश पुग्नेछ । अन्तिम खेलमा मनाङले प्लेअफ विजेता टोलीसँगएन्फा कम्प्लेक्समा २६ जुनको दिन खेल्नेछ ।
समूह चरण तालिका :
३ अप्रिल – विरुद्ध अबहानी लिमिटेड – एन्फा कम्प्लेक्स
१७ अप्रिल – विरुद्ध प्लेअफ विजेता – तय हुन बाँकी
१ मे – विरुद्ध मिनेर्भा पन्जाब – कालिंगा रंगशाला
१५ मे – विरुद्ध मिनेर्भा पन्जाब – एन्फा कम्प्लेक्स
१९ जुन – विरुद्ध अबहानी लिमिटेड – बंगबन्धु रंगशाला
२६ जुन – विरुद्ध प्लेअफ विजेता – एन्फा कम्प्लेक्स
