काठमाडौं (हाम्रो खेलकुद) – नेपाली महिला राष्ट्रिय टोलीले भारतको भुवनेश्वरमा शनिबार सुरु हुने हिरो गोल्डकपको पहिलो खेलमा म्यानमारको सामना गर्दैछ । खेल नेपाली समयानुसार दिउँसो ४:१५ बजे सुरु हुनेछ ।

फिफा वरियता हेर्ने हो भने म्यानमार नेपालभन्दा ६४ स्थान माथि छ । नेपाल १ सय ८ औं स्थानमा छ भने म्यानमार ४४ औं । एसियाली राष्ट्रमध्य पनि म्यानमार नवौं स्थानमा रहेको छ । तर ओलम्पिक छनोटमा नेपाल र म्यानमारको खेल बराबरी सकिएको थियो । नेपालले उक्त खेलमा अग्रता लिएर बचाउन नसक्दा १-१ को बराबरीमा चित्त बुझाउनु परेको थियो ।

ओलम्पिक छनोटमा नेपालले उत्कृष्ट प्रदर्शन गर्दै दोस्रो चरणमा ऐतिहासिक छनोट सफलता प्राप्त गरेको थियो । त्यसयता नियमित प्रशिक्षणमा रहेका खेलाडीले प्रतियोगिताको लागि झापामा रहेर केहि समय प्रशिक्षण पनि गरे । साफ च्याम्पियनसिपको तयारीका रुपमा रहेको यस प्रतियोगितालाई प्रशिक्षक हरि खड्काले सिक्ने अवसरका रुपमा लिएका छन् ।

नेपालसहित आयोजक भारत, म्यानमार र इरानले यस प्रतियोगितामा सहभागिता जनाएका छन् । राउण्ड रोबिन लिगपछि शीर्ष २ टोलीले उपाधिका लागि शुक्रबार फाइनल खेल्नेछन् । नेपालले दोस्रो खेलमा सोमबार भारत र बुधबार इरानको समान गर्नेछ । नेपालले इरानसँग पहिलो पटक खेल्न लागेको हो । म्यानमारविरुद्ध यसअघि ओलम्पिक छनोटमा बराबरी खेलेको नेपालले भारतलाई पनि पराजित गर्न सकेको छैन ।