काठमाडौं (हाम्रो खेलकुद) – नेपाली महिला राष्ट्रिय फुटबल टोलीले हिरो गोल्डकप अन्तर्गत समूह चरणको तेस्रो खेलमा इरानको सामना गर्दैछ । नेपाली समयानुसार ४:१५ बजे सुरु हुने खेलका लागि नेपालले भारतविरुद्ध खेलबाट एक खेलाडी परिवर्तन गरेको छ ।

भारतविरुद्ध टोलीको कप्तानी सम्हालेकी फरवार्ड निरु थापाको स्थानमा युवा मिडफिल्डर सरु लिम्बू सुरुवाती एघारमा आएकी छिन् । इरानविरुद्ध टोलीको कप्तानी रेनुका नगरकोटेले सम्हाल्ने भएकी छिन् । रेनुकाले यसअघि सन् २०१६ मा भारतमा भएको साफ च्याम्पियनसिपमा पनि टोलीको जिम्मेवारी सम्हालेकी थिईन ।

त्यसपछि भने सजना रानामगर र निरु थापाले टोलीको कप्तानी सम्हाले । नियमित कप्तान अनु लामा पहिलो रोजाइमा नपर्दा निरुले कप्तानी सम्हाल्दै आएकी थिइन् । निरु सामान्य चोटका कारण टोलीमा नहुँदा रेनुकाले कप्तानी सम्हालेकी हुन् ।

नेपालले यस खेलमा जित दर्ता गरे प्रतियोगिताको फाइनलमा पुग्ने सम्भावना बलियो हुनेछ । नेपालको जित र अर्को खेलमा म्यानमारले जित वा बराबरी गरे नेपाल म्यानमारसँगै फाइनलमा पुग्नेछ । नेपाल र भारत दुवै जितेको खण्डमा भने म्यानमार, नेपाल र भारतको नतिजा समीकरणले फाइनल खेल्ने टोलीको छिनोफानो हुनेछ ।

इरानविरुद्ध नेपाली टोली :

एन्जिला तुम्बापो सुब्बा : मनमाया लिम्बू, गीता राना, पुनम जर्घा मगर, हिराकुमारी भुजेल : अनिता बस्नेत, रेनुका नगरकोटी (कप्तान), दिपा राई, मन्जली कुमारी योन्जन : सरु लिम्बू : सावित्रा भण्डारी