काठमाडौं (हाम्रो खेलकुद) – बुढासुब्बा गोल्डकपको आयोजक टोली धारण फुटबल क्लब प्रतियोगिताको २१ औं संस्करणको उपाधिका लागि भिड्ने भएको छ । बिहीबार सम्पन्न सेमिफाइनलमा सीएमजी क्लब संकटालाई टाइब्रेकरमा ४-३ ले पराजित गर्दै धरानले फाइनलमा स्थान बनाएको हो ।
निर्धारित समयको खेल गोलरहित बराबरीमा सकिएपछि खेलको नतिजा टाइब्रेकरको साहाराबाट लिइएको थियो । धरानका गोलरक्षक विनय श्रेष्ठले टाइब्रेकरमा दुई पेनाल्टी बचाएपछि घरेलु टोली फाइनल प्रवेश गरेको हो । म्यान अफ द म्याच घोषित विनयले दोस्रो प्रहार गरेका सेड्रिक अबा र चौथो प्रहार गरेका सरोज दाहालको प्रहार बचाएका थिए । उनले १५ हजार रुपैयाँ प्राप्त गरे ।
संकटाका लागि अमित तामाङ, दिपेश आलेमगर र लक्ष्मण रुचालले गोल गरे । यता धरानका लागि हेमन्त थापामगर गोल गर्नबाट चुके । वर्तमान राई, मिलन राई, योगेश राई र दोर्जे तामाङले धरानको लागि गोल गरेका थिए ।
धरानले शनिबार फाइनल खेलमा दोस्रो सेमिफाइनलका विजेतासँग खेल्नेछ । दोस्रो सेमिफाइनलमा शुक्रबार नेपाल पुलिस क्लब र दाउफिन्स खेल्दैछन् ।
