पोखरा (हाम्रो खेलकुद) – चार महिनाको बीचमा लक्ष्मी हुन्डाई मनाङ मर्स्याङ्दी र त्रिभुवन आर्मी पोखरामा नकआउट उपाधिका लागि भिड्दैछन् । धरानलाई बिहीबार १-० ले हराउँदै आर्मीले मनकामना केबलकार पोखरा कप फुटबल प्रतियोगिताको फाइनलमा मनाङगको भेट पक्का गरेको थियो ।
आर्मीका फरवार्ड नवयुग श्रेष्ठ ।
अघिल्लो दिन मनाङले अर्को विभागिय टोली एपिएफमाथि ५-० को जित निकाल्दै अघि बढेको थियो । माघमा पोखरामा आहा रारा गोल्डकपको फाइनलमा मनाङले आर्मीलाई हराएको थियो । धरानलाई हराएपछि आर्मीका प्रशिक्षक मेघराज केसीले माघको हारको पीडा विर्साउने गरि उपाधिका लागि खेल्ने बताएका छन् ।
आर्मीलाई फाइनल पुर्याउने एकमात्र गोल नवयुग श्रेष्ठले गरेका थिए । सन्तोष तामाड्को पासमा झन्डै २५ यार्डबाट नवयुगेको प्रहार गोलमा परिणत भएपछि आर्मी उपाधि नजिक पुगेको हो । आर्मीले माघको हारको बदला लिन्छ वा मनाङले चार महिनामा दोस्रो पटक पोखरामा उपाधि जित्छ त्यसको लागि शनिबार दिउँसो सम्म कुर्नु पर्ने हुन्छ ।
